Астанада Қазақстан мен Иранның жоғары аудит органдары өкілдерінің кездесуі өтті
Қазақстанның Жоғары аудиторлық палатасының мүшесі Нұрлан Нұржанов пен Иран Ислам Республикасының Жоғары аудит сотының бас прокуроры Давуд Мохаммади ведомствоаралық өзара іс-қимылды одан әрі нығайту мәселелерін талқылады, деп хабарлайды BAQ.KZ.
Кездесу Астанадағы ЭКОСАИ басқарма кеңесінің 28-отырысының аясында өтті. Тараптар бүгінде Қазақстан мен Иранның жоғары аудит органдарының ынтымақтастығы достық, өзара сенім және қолдау рухында дамып келе жатқанын атап өтті.
Бұл ретте бірлескен жұмыс тек екіжақты негізде ғана емес, халықаралық салалық ұйымдар шеңберінде де жүріп жатыр.
Атап айтқанда, қазақстандық мемлекеттік аудиторлар ЭКОСАИ желісі бойынша ирандық тарап ұйымдастырған тақырыптық семинарлар мен онлайн-тренингтерден өтті.
Біз үздік шетелдік тәжірибелер мен мемлекеттік аудит әдістерін тұрақты негізде зерделейміз. Тиімділік аудиті, қаржылық есептілік аудиті және электрондық аудит сияқты бағыттар біз үшін ерекше қызығушылық тудырады, — деді Нұрлан Нұржанов.
Кездесу барысында тараптар ведомствоаралық өзара іс-қимылдың бірқатар өзекті мәселелерін, тәжірибе алмасу жоспарларын және аудиторлық процеске заманауи цифрлық технологияларды енгізу перспективаларын талқылады.