Астанада Қайрат Сатыбалдыұлының соты өтіп жатыр

Елордада Қылмыстық істер жөніндегі ауданаралық сотта Қайрат Сатыбалдыұлының соты өтіп жатыр, деп хабарлайды BAQ.KZ тілшісі.

Оған қылмыстық жолмен алынған ақшаны заңдастыру (жылыстату) бойынша айып тағылды (ҚК 218-бабы, 3-бөлігі, 3-тармағы).

Былтыр қыркүйекте Қайрат Сатыбалдыұлының ісі бойынша сот үкімі жарияланды. Ол 28-баптың 3-бөлігі, 189-баптың 4-бөлігі 2-тармағы, 195-баптың 4-бөлігі 2-тармағы бойынша кінәлі деп танылды. 

Қайрат Сатыбалдыұлына мүлкі тәркіленіп, белгілі бір лауазымдарды атқару құқығынан 10 жыл мерзімге айырыла отырып, 6 жылға бас бостандығынан айырылған еді.

Сыбайлас жемқорлыққа қарсы қызмет Қайрат Сатыбалдыұлына қатысты қылмыстық істерді тергеу шеңберінде мемлекетке 732,8 млрд теңге қайтарылғанын мәлімдегенін еске сала кетейік.

Қазіргі уақытта қаражат мемлекетке келтірілген залалды өтеу есебінен республикалық бюджетке жіберілді.