Астанада көпқабатты үйлердегі өрт-тактикалық жаттығулар басталды

ТЖ министрі Сырым Шәріпханов өрт-тактикалық оқу-жаттығуларды бастады, деп хабарлайды BAQ.KZ.

Оның қатысуымен елордада Абай даңғылы бойындағы көпқабатты үйдің тұрғындарын қатыстыра отырып оқу-жаттығу өткізілді. Оқу-жаттығудың негізгі мақсаты халық арасында қауіпсіздік мәдениетін қалыптастыру және нығайту болып табылады. Төтенше жағдайлар туындаған кезде тұрғындардың дұрыс іс-әрекеттері адамдардың өлімі мен жарақаттануының алдын алуға мүмкіндік береді, - делінген ТЖМ баспасөз қызметі таратқан ақпаратта.

Ал өрт сөндіруші-құтқарушылар үшін-бұл адамдарды құтқаруға және эвакуациялауға арналған құралдардың барлық түрлерін қолдана отырып, биік үйлердегі өрттерді сөндіру тактикасын пысықтауға арналған кезекті оқу-жаттығу.

Оқу-жаттығудың жоспарына сәйкес, кабельдік шахтадағы 25 қабатты тұрғын үйде электр кабельдерінің қысқа тұйықталуы болды, одан әрі 5-қабаттағы ажыратқыш өртеніп, өрт жоғарғы қабаттарға таралды.

Оқиға орнына келген өрт сөндіру бөлімшелері тұрғындарды түтін баспайтын баспалдақ маршымен, сондай-ақ автосатылар мен автоиінді көтергіштерді қолдана отырып, эвакуациялады және құтқарды. Адамдарды 20 метрге дейін биіктіктен эвакуациялауға арналған «Өмір кубы» орнатылды.

Түтін сорғышпен жабдықталған арнайы автомобиль кіреберістегі түтінді сорып шығарды.

Сонымен қатар, сол жерде психологтардың жұмысы ұйымдастырылып, Апаттар медицинасы орталығының дәрігерлері алғашқы медициналық көмек көрсетті.

Тұрғын үй кешенінің тұрғындарымен төтенше жағдайлар туындаған кездегі іс-әрекеттер туралы білімдерін шыңдауға бағытталған үгіт-профилактикалық әңгімелер өткізілді.

Төтенше жағдайлар министрлігі халыққа қауіпсіздік шараларын үйретуге барынша күш салуда. Еліміздің барлық өңірлерінде көпқабатты үйлердің тұрғындарын тарта отырып, осындай оқу-жаттығулар өткізілетін болады. Өрт-тактикалық оқу-жаттығуларды тұрғындар үшін де, өрт сөндіру бөлімшелері үшін де күтпеген жағдайда өткізу жоспарлануда.