Астанада Дүниежүзілік Көшпенділер ойындарына дайындық тексерілді

Бүгін жарыстарды өткізу жөніндегі штаб мүшелері елорданың коммуналдық, медициналық, полиция және өрт сөндіру қызметтерінің дайындығын тексерді. Сол сияқты жеке құрамның, арнайы техниканың, медициналық және құтқару жабдықтарының дайындығы тексерілді, деп хабарлайды BAQ.KZ елорда әкімдігінің ресми сайтына сілтеме жасап.

Штаб мүшелері бірқатар нысанды – Ұлттық музей, «Думан» қонақ үйі, этноауыл, «Қазанат» ипподромы, жекпе-жек сарайы және «Астана Арена» нысандарын тексерді.

Қазіргі уақытта барлық қызмет мамандарының тұратын орындары анықталды, тамақтану мәселелері және т.б шешілді. Барлығы 150 медицина қызметкері тартылады.

Бұдан басқа, іс-шараларды өткізу кезеңінде барлық коммуналдық қызметтің үздіксіз жұмысы қамтамасыз етіледі.

Пайдаланушы кәсіпорындар сумен жабдықтау және су бұру жөніндегі инженерлік коммуникацияларға, Дүниежүзілік Көшпенділер ойындарын өткізуге тартылған нысандарға тексеру жүргізді. Жүйелер штаттық режимде жұмыс істейді.

Кәсіпорындар жауапты тұлғаларды белгіледі, авариялық қызметтердің кезекшілік кестелері жасалды және бекітілді. Кез келген ықтимал ақауларға жедел ден қою үшін дайындықта болатын арнайы бригадалар құрылды.

Негізгі нысандар мен коммуникациялардың тәулік бойы мониторингін қоса алғанда, инженерлік жүйелердің жұмысына бақылауды күшейту бойынша қосымша шаралар әзірленді және енгізілді. Іс-шаралар өтетін барлық нысанда резервтік тамақтану қамтамасыз етілген.

5-ші Дүниежүзілік көшпенділер ойындары Астанада 8-13 қыркүйек аралығында өтеді, оған әлемнің 89 елінен 2500-ден астам қатысушы қатысады.

Астанада өтетін Бүкіләлемдік көшпенділер ойындарында спорттың 21 түрінен 97 медаль жиынтығы ойналады.