Астана әлемдік деңгейдегі онкология тәжірибесінің орталығына айналды
Елордада алғаш рет «Онкологиялық ауруларды диагностикалаудың және емдеудің ғылыми-практикалық аспектілері» атты халықаралық мамандардың қатысуымен ғылыми конференция өтіп жатыр, деп хабарлайды BAQ.KZ тілшісі.
Екі күнге жалғасатын ғылыми жиын еліміздің онкологиялық қызметінің «ковидтен кейінгі дәуірдегі» басты сын-қатерлері мен трансформацияларын талқыға салады. Дәріскерлер дәрілік терапияға және онкологиялық патологияларды диагностикалауға жаңа тәсілдерді ұсынады. Конференция жұмысында әсіресе сүт безі қатерлі ісігі, онкогинекология, бірнеше миелома, бас және мойын ісіктері, іштің онкологиясы, онкоурология, онкогематология, онкогепатология, паллиативті медицина салалары алға қойылды.
Жыл сайын ел аумағында қатерлі ісіктердің белгіленген түрлері бойынша 35 000-нан астам жағдай анықталады. Аурудың жыл сайын 4-9%-ға өсуі байқалады. Айта кету керек, әйелдер арасында қатерлі ісік ерлерге қарағанда жиі анықталады. Мысалы, 2021 жылдың қорытындысы бойынша ерлердің 43%-ы, әйелдердің 57%-ы қатерлі дертке шалдыққан. Ерлер арасында қатерлі ісік ауруының құрылымында өкпе обыры, асқазан обыры және қуықасты безінің (простата) обыры көбірек анықталады. Әйелдер арасында сүт безі қатерлі ісігі, жатыр мойыны обыры және аналық без обыры жиі кездеседі. Қатерлі ісік аурулары өлім-жітім қан айналымы жүйесі мен тыныс алу органдарының ауруларынан кейін үшінші орын алып, қазақстандықтардың өмірін жиі алып кететін себептердің көшбасшыларының үштігінде қалып отыр, - деп атап өтті Ұлттық ғылыми онкология орталығы басқарма төрағасының орынбасары Әділбек Мұқажанов.
Конференцияға онколог, химиотерапевт, сәулелік терапевт, рентгенолог, радиотерапевт, жалпы тәжірибелік дәрігерлер, денсаулық сақтауды ұйымдастырушылар, медбикелер, маммолог, гинеколог, уролог, колопроктолог, гематолог, гепатолог, гастроэнтеролог, эндоскопист, ультрадыбыстық диагностика мамандары қатысуда.
Сондай-ақ Ресей, Жапония, Корея, Түркия, Франция, Армения және Грузиядан келген әріптестер онкология саласындағы соңғы әзірлемелермен және тиімді технологиялармен бөлісіп, Ұлттық ғылыми онкология орталығының тәжірибесі ұсынылып отыр.