Астана әкімі «Көктал 2» елді мекенінің тұрғындарымен кездесті

Астана қаласының әкімі Жеңіс Қасымбек Instagram парақшасында «Көктал 2» елді мекенінің тұрғындарымен кездесуде көтерілген мәселелер туралы жазды, деп хабарлайды BAQ.KZ елорда әкімдігінің ресми сайтына сілтеме жасап.

«Көктал 2» елді мекенінің тұрғындарымен кездестім.Қала тұрғындары инженерлік желілер, газдандыру, камералар, бағдаршамдар орнату, маршруттарды іске қосу, тұрғын үй кешендерін, әлеуметтік нысандарды жөндеу, абаттандыру және т.б. мәселелерді көтерді, - деп жазды Жеңіс Қасымбек.

Ол кейбір мәселелерге қысқаша тоқталып өткенін айтты.

Мәселен оқушы орындарының санын арттыру үшін «Көктал 2» елді мекенінде 2 мың орынға арналған жайлы мектептің (Ұлытау-Наурыз көшелерінің қиылысы) құрылысы басталды. Оны келесі жылы тапсыруды жоспарлап отырмыз.

Сарыарқа ауданы да елді мекен сияқты газдандырылған. Бірақ жекелеген тұстары да жоқ емес. Олар бойынша жауапты басқарма тиісті мерзімдерін белгілейді. Сондай-ақ кейбір инженерлік инфрақұрылым желілерін коммуналдық қызметтердің балансына беру ісінде проблемалар бар.

Бейнебақылау камералары бойынша да мәселелер көтеріледі. Биыл қалада мыңға жуық камера орнатуды жоспарлап отырмыз, оның 300-ін Сарыарқа ауданына, 100-ін «Көктал-1» және «Көктал-2» елді мекеніндеріне орнатамыз,-  деп жазды Жеңіс Қасымбек.

Сондай -ақ ол кездесуде тұрғындар Қазақстандық тұрғын үй компаниясының (ҚИК) желісі бойынша салынған тұрғын үй кешендері жөнінде бірнеше сұрақ қойлғанында айтты.

Кемшіліктерді бірге жоямыз. Кездесуде көтерілген мәселелерді кезең-кезеңімен шешетін боламыз, - деп жазды Жеңіс Қасымбек.