Ассамблеяның жұмысы: формалдылық па, әлде жаңа серпін бе?
Қазақстан халқы Ассамблеясы – этносаралық келісім мен қоғамдық тұрақтылықтың берік тұғыры. Сарапшылардың пікірінше, бұл институт жастармен жұмысты жандандырып, жаңа буынның азаматтық санасын қалыптастыруда нақты нәтижелерге қол жеткізіп отыр, деп хабарлайды BAQ.KZ тілшісі.
PhD доктор, тарихшы Закарья Рахметолланың пікірінше, ҚХА-ның қоғамдық салмағы әлсіреп жатқан жоқ, керісінше, жаңа кезеңдегі сын-қатерлер мен реформалар аясында рөлі артып келеді.
Ассамблеяны формалдылыққа айналды деп айту әділетсіз болар еді. Оның жастарға әсері — нақты, жанды және өскелең. ҚХА – қоғаммен бірге дамып келе жатқан құрылым, - дейді тарих ғылымдарының PhD докторы Закарья Рахметолла.
Ассамблея этносаралық диалогтың алаңы ретінде барлық этнос өкілдерінің қоғамдық өмірге белсене араласуына, өз мәдениеті мен тіліне құрметпен қарап, әділетті қоғам құруға үлес қосуына жағдай жасап отыр. Мемлекет басшысы Қасым-Жомарт Тоқаев Ассамблеяның ХХХІІ сессиясында: «Дәстүрдің тоғысуы, ұлтаралық және конфессияаралық келісім – біздің баға жетпес байлығымыз», – деп атап өткен болатын.
Жастармен жұмыс – Ассамблеяның басты бағыты
ҚХА құрамындағы Жастар қанаты, достық клубтары, еріктілер ұйымдары мен түрлі мәдени-білім беру жобалары жастарды елдің этникалық әралуандығын терең түсініп, толеранттылық пен азаматтық бірегейлікті дамытуға тартуда. Олар диалог алаңдары, форумдар мен ғылыми жобалар арқылы өзара тәжірибе алмасып, жаңа идеяларды жүзеге асыруда.
Президент Қасым-Жомарт Тоқаев та Ассамблеяның басты миссияларының бірі – «жастардың бойына өз Отанының тағдырына араласу және оның болашағы үшін жауапкершілік сезімін қалыптастыру» екенін айтқан болатын.
Бүгінде ҚХА жастар арасында ғылым мен білімге де серпін беріп отыр. Этноәлеуметтану, ұлтаралық қатынастар мен мәдениетаралық байланыс салаларында жас ғалымдарды қолдау арқылы зияткер ұрпақ тәрбиелеуге үлес қосып келеді.
Осылайша, Қазақстан халқы Ассамблеясы – бірліктің, келісімнің және толеранттылықтың нақты тетігі. Ол тек саяси институт қана емес, жастарға жол көрсетіп, болашаққа сеніммен қарауға ықпал етіп отырған маңызды қоғамдық күш.
Сонымен қатар Симара Гусейнова Қазақстан халқы Ассамблеясының жастармен жұмысындағы рөлін айтып берді
Қазақстан халқы Ассамблеясы (ҚХА) – елдегі этносаралық келісім мен азаматтық бірліктің басты тұғырларының бірі. Бұл құрылымның жастарға әсері туралы 1-курс студенті, ҚХА студенттік ұйымының төрағасы әрі Астана қаласындағы «Хазар» жастар ұйымының жетекшісі Симара Гусейнова өз ойын айтты.
«Ассамблея – қоғамның дамып жатқан тірі ағзасы»
Симара Гусейнова ҚХА-ның рөлі уақыт өткен сайын әлсіреп жатыр деген пікірмен келіспейді. Керісінше, ол Ассамблеяны заман талаптарына бейімделіп, жаңа мазмұнмен толығып келе жатқан институт ретінде сипаттайды.
Қазақстан халқы Ассамблеясы — уақыттың талаптарына жауап беріп қана қоймай, қоғамның ой-санасын қалыптастыратын тірі және дамып келе жатқан институт. Ол – этносаралық үйлесім саласындағы мемлекеттік саясаттың ажырамас бөлігі, – дейді ол.
Симара өз сөзінде еліміздің Тұңғыш Президенті Нұрсұлтан Назарбаевтың «Ассамблея — бұл әлемде баламасы жоқ ерекше орган» деген сөзін келтіріп, қазіргі Президент Қасым-Жомарт Тоқаевтың: «Бірлік пен келісім — біздің Тәуелсіздігіміздің мызғымас тірегі» деген пікірін ерекше атап өтті. Оның ойынша, бұл қағидалар – Ассамблея жұмысының стратегиялық негізі.
Жастармен жұмыс – формалдылық емес, шынайы әсер
Симара Гусейнова 2025 жылы университетте ҚХА студенттік ұйымын құрып, этносаралық келісім идеяларын жастар ортасында насихаттауға ден қойған. Бүгінде бұл ұйым студенттердің құқықтық мәдениетін, диалог пен өзара түсіністікті дамытуға бағытталған бастамалардың ұйытқысына айналған.
Біз жобаларды жүзеге асырып жатырмыз, онда жастар тек қатыспайды – олар шығармашылықпен айналысады, ойлайды, бірігеді. Бұл — мотивациялық кездесулер, буындар арасындағы диалогтар, волонтерлік акциялар. Барлығы Ассамблеяны формализм емес, тірі механизм етеді, – дейді студент.
Ол сондай-ақ қоғамдық қайраткер Ануар Батыровтың: «Жастар — бұл тек ұлттың болашағы емес, оның қазіргі күні. Және Ассамблея бізге нағыз азамат болуды үйретеді» деген сөзін келтіріп, бұл пікір өзінің тәжірибесімен толық үндесетінін атап өтті.
Бірлік – біздің қанымызда бар
Симара ұлттар достастығы мен бірлікті ата-бабалардан қалған рухани мұра деп санайды. Көшпенділердің ұрпағы ретінде достық, өзара көмек және құрмет секілді құндылықтар жастар санасына Ассамблея арқылы жаңаша мәнмен сіңіп жатыр дейді.
Ассамблея бізге кім екенімізді еске салады. Ол мәдениетімізді, тілімізді, төлқұжатымызды сақтауға көмектесіп, сонымен қатар жаңа, біріккен және бейбіт болашаққа жол ашады, – дейді Симара.
Ол өз ойын ақын Олжас Сүлейменовтің: «Мен көшпенді ұрпағымен мақтанамын – ол ғасырлар бойы жоғалған жоқ» деген сөзімен түйіндеді.
Симара Гусейнова үшін Қазақстан халқы Ассамблеясы – келісім философиясы, құқықтық мәдениет пен азаматтық кемелдіктің символы. Оның айтуынша, Ассамблея тек дәстүрді жалғастырып қана қоймай, оны қайта жасап, бейбітшілік пен достыққа жол ашып отыр.
Біз тек дәстүрді жалғастырмаймыз, біз оны қайтадан жасаймыз – бейбітшілік, достық, Қазақстан үшін. Біз біріккен кезде – біз жеңеміз, – дейді ол.