Қарттар мен көпбалалы аналар таксиде тегін жүреді

Нұр-Сұлтан, BAQ.KZ. Қарағанды облысында еріктілер жылына жаңа әлеуметтік жобалар іске қосылады.

Еріктілер тарихи ескерткіштерді ретке келтіріп, балалар алаңдарын жөндейтін болады. Ардагерлерге, жалғыз басты қарияларға және көп балалы отбасыларға арналған тегін такси пайда болады.

"Saryarqa jastary" облыстық волонтерлік штабында өңір басшысы Жеңіс Қасымбекпен болған кездесуде белсенділер облыстағы еріктілер жылы қандай игі істерге толы болатынын талқылады.

- Облыстың барлық қалалары мен аудандарында еріктілерді қолдау орталықтары ашылуда. Міндет – еріктілер қозғалысына барынша көп адамдарды тарту. "Асыл мұра" жобасы аясында еріктілер тарих және мәдениет ескерткіштерін қалпына келтіруге көмектесетін болады. Тағы бір ауқымды жоба – "Мейірім" жобасы, оның мақсаты – балалар үйінің тәрбиеленушілеріне қоғамдағы бейімделуге, болашақ мамандығын таңдауға көмек көрсету. Волонтерлік ұйымдар "SJ" акциясын іске қосады, - деді Қарағанды облысының жастар саясаты мәселелері жөніндегі басқармасының басшысы Нұржан Жетпісбаев.

Ол еріктілердің жыл ұранын еске салды: "Біз біргеміз". Барлық волонтерлік жобалар жеті бағытқа біріктірілді.

Нұржан Жетпісбаев "Тегін такси" жобасын ұсынды. Оның айтуынша, аталмыш шараға қатысуға бірнеше таксопарктер келісім берген. Волонтерлер штаб құрып, қала бойынша жүріп-тұруы қиын адамдардан өтініштер қабылдайтын болады. Ұлы Отан соғысының ардагерлері мен тыл еңбеккерлері, жалғыз басты қарт адамдар, сондай-ақ көп балалы отбасылар тегін көліктерді пайдалана алады.
Кездесуге әр жастағы еріктілер жиналды. 55 жас аралығындағы "күміс" еріктілер болып табылатын аға буын өкілдері өздерінің жетістіктерімен және жоспарларымен бөлісті.

Көбі еріктілер – жастардың ісі деп санайды. Бұл мүлдем дұрыс емес. Егде жастағы адамдар қоғамға пайда әкелуді жалғастыруға, өз білімі мен тәжірибесімен бөлісуге дайын. Біздің ұйым "Шаңырақ" волонтерлік орталығымен ынтымақтасады. Оның көмегімен Мәскеуге "күміс" волонтерлер форумына барып қайтты, - деп атап өтті Теміртау ардагерлер кеңесінің төрағасы Бірлікбай Ордабаев. 

Облыс әкімі еріктілер қозғалысын кеңейтіп, жаңа азаматтық бастамаларды ұсынуға шақырды.

Мемлекет басшысы айтқандай, еріктілер сенбіліктермен және бір жолғы челлендждермен шектелмейді. Еріктілік – бұл патриотизмнің жоғары көрінісі. Альтруизм – өмірлік қағидаттардың бірі. Және игі істерде жүйесіздік болмауы тиіс. Біз бәріміз бірге өмірімізді жақсартамыз, - деп атап өтті Жеңіс Қасымбек.

Өңір басшысы еріктілердің облыстық іс-шаралар жоспарын жүзеге асыру жөнінде тапсырма берді. Волонтерлерге көмек ретінде аймақтық ресурстық орталық ашылады, шеберлік сабақтары, тренингтер мен оқыту семинарларын ұйымдастырады.