Ардагерлер мен тыл еңбеккерлеріне төленетін әлеуметтік төлемдер артты

ҰОС ардагерлері мен тыл еңбеккерлеріне төленетін әлеуметтік төлемдер артты, деп хабарлайды BAQ.KZ тілшісі.

Бұл туралы Еңбек және халықты әлеуметтік қорғау вице-министрі Олжас Анафин Орталық коммуникациялар қызметінің алаңында өткен баспасөз мәслихатында мәлімдеді.

Айтуынша, бүгінде ардагерлерге әлеуметтік қолдау шаралары орталық және жергілікті деңгейде жүзеге асырылып жатыр.

Биыл 1 қаңтардан бастап төлем мөлшері базалық зейнетақы бойынша 6,5%-ға және ынтымақты зейнетақы бойынша 8,5%-ға өсті. Қабылданған шаралар халықаралық тәжірибеде ұсынылатын табысты зейнетақы төлемдерімен алмастыру коэффициентін (40%) орындауға мүмкіндік берді. Бұл көрсеткіш елде 54,8%-ды құрады, - деп атап өтті вице-министр.

Сонымен қатар басқа әлеуметтік төлемдерге қарамастан азаматтардың 19 санатына арнаулы мемлекеттік жәрдемақы төлемі жүзеге асырылады.

Нәтижесінде, 2025 жылғы 1 мамырға Ұлы Отан соғысының ардагерлері алатын әлеуметтік төлемдердің жиынтық мөлшері 271 мың теңгені, Ұлы Отан соғысы уақытындағы тыл еңбеккерлерінің жиынтық мөлшері 179 мың теңгені құрады, - деді Олжас Анафин.