Ақтөбе облысында заңсыз балық аулаған 6 адам ұсталды: 17 қап балық тәркіленді

Ақтөбе облысы Полиция департаментінің Ұйымдасқан қылмысқа қарсы күрес басқармасының қызметкерлері жедел-іздестіру іс-шараларын жүргізу барысында ерекше қорғалатын табиғи аумақта заңсыз балық аулау дерегінің жолын кесті.

Ырғыз ауылынан 75 шақырым жерде орналасқан, ерекше қорғалатын табиғи аумаққа жататын «Айкөл» көлінде заңсыз балық аулап жүрген 6 жергілікті тұрғын ұсталды.

Оқиға орнын қарау барысында «УАЗ», ВАЗ-2107 және «УАЗ Патриот» автокөліктері, ұзындығы 100 метрден болатын екі балық аулау торы, екі үрлемелі резеңке қайық, сондай-ақ сазан және шортан тұқымдас балықтар салынған 17 қап тәркіленді, - деп хабарлады облыстық Полиция департаменті.

Тәркіленген автокөліктер аудандық полиция бөлімінің арнайы тұрағына қойылды.

Аталған факті бойынша Қазақстан Республикасы Қылмыстық кодексінің 335-бабы («Балық ресурстарын, басқа да су жануарларын немесе өсімдіктерін заңсыз өндіру») бойынша сотқа дейінгі тергеп-тексеру жүргізілуде.

Қазіргі уақытта оқиғаның барлық мән-жайы анықталуда. Қоршаған ортаға келтірілген залал көлемі уәкілетті органның қорытындысымен айқындалатын болады.

Еске салсақ, ШҚО-да Қызыл кітапқа енген балықтарды аулаған браконьерлер ұсталған еді. Марқакөл және Урунхайка ауылдарында жүргізілген тінту барысында бағалы балық түрлерінің 700 келіден астамы, оның ішінде ускуч пен хариус балығы, сондай-ақ 200 литрден астам ускуч уылдырығы тәркіленді.