Ақмолада полицейлер өзін нашар сезінген жүргізуші әйелді құтқарды

Ақмолада полицейлер жүргізуші әйелге көмектесті, деп хабарлайды BAQ.KZ Polisia.kz-ке сілтеме жасап. 

25 қарашада сағат 20:40 шамасында Астана – Қабанбай батыр автожолының 20-шы шақырымында орналасқан "Бекет" блокбекетінде кезекшілік атқарған полиция қызметкерлеріне күтпеген жағдайға тап болған әйел жүгінді. 

Toyota көлігінің жүргізушісі өзін кенеттен нашар сезініп, жағдайының күрт нашарлағанын, жүрек сыр беруі мүмкін екенін жеткізді. Жағдайдың шұғылдығын түсінген тәртіп сақшылары бірден әрекетке көшті. Кезекші бөлімге оқиғаны баяндаған соң, олар әйелді көліктің жолаушылар орындығына ауыстыруға көмектесті. Бір полицей рульге отырып, оны шұғыл түрде Қосшы қаласындағы ең жақын медициналық мекемеге жеткізді. 

Полиция қызметкерлері әйелді аурухананың екінші қабатына көтеріп, дәрігерлердің қолына тапсырды. Дер кезінде көрсетілген көмектің арқасында науқастың жағдайы тұрақтандырылып, қазіргі уақытта оның өмірі мен денсаулығына қауіп төніп тұрған жоқ. Осы оқиғадан кейін азаматша полиция қызметкерлеріне шынайы ризашылығын білдірді. 

Ол тәртіп сақшыларының жеделдігі мен жанашырлығына ерекше алғысын айтып, олардың осындай қиын сәтте қол ұшын созғанын жоғары бағалады.