Антикор Атырауда 43 млн теңге бюджет қаражатын жымқыруға жол бермеді

Атырау облысының сыбайлас жемқорлыққа қарсы күрес департаменті Индер ауданында инженерлік-коммуникациялық инфрақұрылым (сумен жабдықтау) салу кезінде орындалған жұмыстың жалған актілеріне қол қою арқылы бюджет қаражатын жымқыру тәуекелін анықтады, деп хабарлайды BAQ.KZ.

Индер ауданының құрылыс бөлімі мен «Байсын-А» ЖШС арасында Индер ауданының Аққала ауылындағы «оң жағалау» бөлігінің учаскесіне жалпы сомасы 1 млрд теңгеден астам инженерлік-коммуникациялық инфрақұрылым салуға шарт жасалған.

Тапсырыс беруші қазан және маусым айларында орындалған жұмыс актілеріне қол қойды, сондай-ақ ақы төленді, алайда іс жүзінде жұмыс орындалмады.

Атап айтқанда бетоннан жасалған аялдамалар, полиэтилен құбырдан жасалған құбырлар, қиыршық тас негізі және басқа да құрылғылар орнатылмады.

Залалдың сомасы 43 млн теңгеден асты.

Анықталған заңбұзушылықты Атырау облысының мемлекеттік сәулет-құрылыс бақылау басқармасы және Атырау облысы бойынша ішкі мемлекеттік аудит департаменті маманының қорытындысы растады.

Қазіргі уақытта Атырау облысы әкімдігінің жауабына сәйкес кемшіліктер жойылған, объект көрсетілген мерзімде уақтылы тапсырылады.

Ақпаратты растау, осы мәселені талқылау және сыбайлас жемқорлық құқық бұзудың алдын алу мақсатында Атырау облысы бойынша сыбайлас жемқорлыққа қарсы қызметтің басшысы Ерлан Досанов Индер ауданы Аққала ауылындағы сумен жабдықтау объектісіне барды.

Департаменттің араласуынан кейін анықталған заңбұзушылықтар толығымен жойылған, кінәлі адамдар жазаланған. Ерте анықталған кемшілік бюджет қаражатын ұрлауға жол бермеуге және сапасыз құрылыстың алдын алуға мүмкіндік берді, сондай-ақ халықты уақтылы таза ауыз сумен қамтамасыз етуге мүмкіндік берді, – деп атап өтті облыстық антикор басшысы Ерлан Досанов.