Әмин Тұяқов атындағы жеңіл атлетика турнирінің жеңімпаздары анықталды

Астана қаласында алғаш рет өткен Astana Indoor Meet for Amin Tuyakov Prizes халықаралық турнирі өз мәресіне жетті, деп хабарлайды BAQ.KZ.

Спортты дамыту дирекциясы мәлім еткендей, жарысқа 45 елден 136 спортшы қатысты.

Оның ішінде 4 Олимпиада чемпионы, 10 әлем чемпионы, 3 Еуропа чемпионы, 1 Азия чемпионы болды.

Атап айтсақ, турнирге сырықпен секіруден Токио Олимпиадасының жеңімпазы, екі дүркін әлем чемпионы, тағы күміс жүлдегері, қазіргі әлем рекордының иесі (6,23 м) Арман Дуплантис (Швеция) қатысты.

200 метрге жүгіруде Гауһар лига финалының жеңімпазы Андре де Грасс (Канада), 100 метрге кедергі арқылы жүгіруден әлем чемпионы, Рио Олимпиадасының күміс жүлдегері Ниа Али, 100 метрге кедергі арқылы жүгіруден әлем чемпионы Тоби Амусан секілді жеңіл атлетика жұлдыздары да бақ сынады.

Жарыс қорытындысы бойынша чемпион атанған спортшылар көктемде Глазгода (Шотландия) өтетін жабық кешендегі әлем чемпионатына тікелей жолдама алды.