Алматының Наурызбай ауданында Инновациялық өнер орталығы салынады

Алматы, BAQ.KZ тілшісі. Бұл туралы Наурызбай ауданының әкімі Санжар Тоғай онлайн брифингте айтты.

Оның айтуынша, алдағы уақытта аудандық әкімшілік орталық жанынан Инновациялық өнер орталығы, Таусамалы ықшам ауданында мүмкіндігі шектеулі балаларға арналған музыкалық мектеп, 2 дене шынықтыру-сауықтыру кешенін салу жоспарланып отыр.

Сонымен қатар ол ауданда жаңадан тағы да бірнеше емхана салынатынын айтты.

Денсаулық сақтау саласына келсем, жаңадан салынған 4 емханамен қатар, Құрамыс ықшам ауданында 500 орындық емхана, Ақжар ықшам ауданында 200 орындық жанұялық-дәрігерлік амбулаториясын салу және халық шет тұратын аймақтарды мобильді амбулатория ашу жоспарлануда. Ал, білім беру саласына келсем. Сапалы білім беру мен мектептердегі орын тапшылығын жою үшін Қалқаман ықшам ауданында 2 мектеп, Қарағайлы ықшам ауданында бір мектеп, Қалқаман, Қарағайлы, Шұғыла ықшам аудандарында 3 бала бақша құрылыстары басталмақ,-деді ол.

Ауданда қазір 2 мектептің құрылысы басталып кеткен, сондай-ақ тағы бір мектептің құрылысы бітуге жақын.

Қалқаман шағынауданындағы 1500 және 1800 орынға арналған 2 мектептің құрылысы басталды, Ақжар шағынауданындағы №186 мектепке қосымша құрылыс ғимараты аяқталуда. Қарғалы және Ақжар ықшам аудандарында 2 жекеменшіктік мектептер салынып жатыр. Ақжар және Таусамалы шағынаудандарында 120 орындық 2 балабақшаның құрылысы аяқталуға жақын. Сондай-ақ Ақжар шағын ауданында 6 автокөлікке арналған өрт сөндіру депосының құрылысы жүргізілуде,-деді аудан әкімі.

Сондай-ақ аудандағы №7 ҚКА қабылдау бөлімі құрылысы жүргізіліп жатыр және 16 мекенжайда көп қабатты тұрғын үй құрылысы басталған.