Алматының бас санитарының жаңа қаулысы жарияланды

Нұр-Сұлтан. BAQ.KZ. Алматы қаласы бас санитарлық дәрігері Жандарбек Бекшиннің жаңа қаулысы жарияланды.

Қызметі жаңартылмаған объектілерге: боулинг-орталықтарға, компьютерлік клубтарға («Ashyq» пилоттық жобасына қатысатын объектілерді қоспағанда), бильярд, караоке, батуттар, түнгі клубтар, букмекерлік кеңселер, лото және ойын клубтары, жабық үй - жайлардағы ойын алаңдары мен аттракциондарға, оның ішінде спорт объектілерінде орналасқандарды қоспағанда, мұз және роликті мұз айдындарына баруға тыйым салу қалады, - делінген қаулыда.

«Ashyq» пилоттық жобасына қатысатын кәсіпкерлік объектілеріне кіру үшін App Store және Play Market-тен жүктеу үшін қолжетімді «Ashyq» мобильді қосымшасын пайдалану қажет. Келушіде смартфон болмаған немесе осы мобильді қосымшаны жүктеу кезінде қиындықтар туындаған жағдайда жауапты тұлға – мекеме қызметкері қосымшада ЖСН енгізу арқылы келушінің кіруін тіркеуге құқылы.

Қоғамдық орындарға, оның ішінде қалалық қоғамдық көліктерге және қызметіне рұқсат етілген объектілерге барған кезде, сондай-ақ қоғамдық орындарда ашық ауада болған кезде (5 жасқа дейінгі балаларды қоспағанда және ашық ауада спортпен шұғылдану кезінде) бетперде кию, қашықтықты сақтау және антисептиктерді пайдалану жөніндегі талаптарды қатаң сақтау қажет.

Сауда кәсіпорындары қауымдастығының ұсынысына сәйкес ауданы 1000 шаршы метрден асатын сауда объектілеріне (СОО, СҮ, базарлар), қоғамдық тасымалдауды жүзеге асыратын ұйымдарға (автобус, троллейбус, метро) келушілердің өз объектілерінде әлеуметтік қашықтық пен бетперде режимін сақтауын тұрақты бақылау үшін санитарлық патрульдерді қалыптастыру ұсынылсын, - делінген қаулыда.

Мерекелік корпоративтерді ұйымдастыруға және өткізуге тыйым салу қалады. Балаларды сауықтыру лагерлерінің қызметіне тыйым салынады.

Ұлттық құрамалар, клубтық командалар үшін спорттық жаттығуларға рұқсат етілген (30 адамнан артық емес, байланыссыз термометрия, спорттық базаларда тұру).