Алматылық азамат Таиландтан "қоспасы бар ірімшік" тасығаны үшін 16 жылға сотталды

Алматылық азамат Таиландтан "қоспасы бар ірімшік" әкелгені үшін 16 жылға сотталды, деп хабарлайды BAQ.KZ тілшісі Бас көлік прокуратурасына сілтеме жасап.

Шілде айында Алматы қаласының қылмыстық істер жөніндегі мамандандырылған ауданаралық соты алқабилердің қатысуымен қала тұрғынына қатысты үкім шығарды. 

Ол аса ірі көлемде есірткі заттарын контрабандалық жолмен өткізу және сату қылмыстары үшін кінәлі деп танылды.

Тергеу және сот процесі барысында оның есірткі және психотроптық заттарды кедендік шекара арқылы заңсыз өткізіп, оларды халықаралық пошталық сәлемдеме ішінде жасырғаны анықталды. Тыйым салынған заттар Таиланд Корольдігінен "Cheddar" ірімшігі түрінде жеткізілген. Алушы сәлемдеме ішіндегі заттарды үшінші тұлғаларға беруді жоспарлаған, - деп жазылған Бас көлік прокуратурасының хабарламасында. 

Құқық қорғау және кеден органдарының үйлесімді әрекеттерінің нәтижесінде қылмыстық әрекет сату сатысына жетпей тұрып әшкереленді.

Мемлекеттік айыптаушы ауыр жаза тағайындаудың қажеттілігін негіздеп, сот бұл уәжбен келісіп, сотталушыны орташа қауіпсіздік деңгейіндегі қылмыстық-атқару жүйесі мекемесінде өтеумен 16 жылға бас бостандығынан айыру жазасын тағайындады.

Үкім заңды күшіне енген жоқ.

Еске салайық, бұған дейін Астанада кеңсеге терезеден кіріп, сейфті көтеріп кеткен ұры ұсталғанын хабарлаған болатынбыз.