Алматыдағы педагогика университетінің 298 оқытушысы екпе салдырды

Алматы, BAQ.KZ тілшісі. Өңірлік коммуникациялар қызметі алаңында өткен брифингте Абай атындағы Қазақ ұлттық педагогикалық университетінің ректоры Дархан Біләлов оқытушылар қауымы коронавируске қарсы екпені жаппай салдырғанын атап өтті.

Педагогикалық университеттің қызметкерлері өз еркімен вакцина алу туралы шешім қабылдады. 298 адам екпе алды. Бұл жақындарының, әріптестері мен студенттерінің денсаулығына қамқор болатын оқытушылардың саналы таңдауы,-деді ректор.

Сонымен қатар ол пандемия барлық жоғары оқу орындарына қашықтан оқытудың жаңа тәжірибесін әкелгенін атап өтті.

Аралас оқыту форматының артында мұғалімдердің біліктілігін арттыруға мүмкіндік беретін болашақ бар. Қашықтан оқытудың жағымды жақтарына қарамастан, студенттер офлайн режимде жақсы оқиды. Студент жастарды ата-аналары мен жақындарына жауапкершілік танытуға шақырамын. Егер сіз ауру жұқтырсаңыз, отбасындағы қарт адамдардың сауығуы өте қиын, - деді Д. Біләлов.

Ректор оқытушыларды, студенттерді, талапкерлерді, студент жастарды вакцина алуға және ұжымдық иммунитетті құруға шақырды. Бұл коронавирустық пандемияға қарсы тұрудың жалғыз жолы және қалыпты өмір салтына оралудың кепілі. Д. Біләловтің айтуынша, мамандарды тарта отырып, вакцина жайлы түсіндірме жұмыстары жүргізілуде.