Алматыда жасөспірімдердің қауіпсіздік мәселесі қаралды
Алматы, BAQ.KZ. Бүгін Қазақстан Республикасы ІІМ Мақан Есболатов атындағы Алматы академиясы мен TALAP қолданбалы зерттеулер орталығы бірлесіп, «Кәмелетке толмағандарға қатысты құқық бұзушылықтарға қарсы іс-қимыл: проблемалар мен шешу жолдары» атты Халықаралық ғылыми-практикалық конференция өткізді.
Аталған шара ҚР Президенті Қасым-Жомарт Тоқаевтың Қауіпсіздік Кеңесі аппаратының отырысында айтылған тапсырмасы шеңберінде және ішкі істер министрі полиция генерал-лейтенанты Ерлан Тұрғымбаевтың бастамасы бойынша Халықаралық балаларды қорғау күніне орай ұйымдастырылды.
Аталған іс-шараның мақсаты - балаларды отбасылық-тұрмыстық және сексуалдық зорлық-зомбылықтан қорғау, қазіргі заманның шындығына сәйкес кәмелетке толмағандардың қауіпсіздігі мен құқықтарын қорғауды қамтамасыз ету тетіктерін жетілдіру. Конференция тақырыбының өзектілігі елдің болашағы үшін елеулі қатер төндіретін және жастардың толыққанды дамуы, әрбір тұлғаның қалыптасуы үшін теріс салдарларға әкеп соғатын балаларға қатысты құқық бұзушылықтардың өсуіне байланысты күн тәртібінен түспей тұр, - делінген хабарламада.
Конференцияны Қазақстан Ішкі істер министрі, полиция генерал-лейтенанты Ерлан Тұрғымбаев ашты. Ол өз сөзінде кәмелетке толмағандарға қатысты құқық бұзушылықтардың алдын алуға байланысты өзекті мәселелерге, сондай-ақ оларды шешу бойынша ІІМ қызметінің негізгі бағыттарына назар аударды. Қазақстан Республикасы Президентінің көмекшісі – Қауіпсіздік Кеңесінің хатшысы Ә.Ө. Исекешев конференция қатысушыларына арнап құттықтау сөз сөйледі.
ҚР Парламенті Сенатының депутаты Д.О. Нұржігіт, ҚР Парламенті Мәжілісінің Әлеуметтік-мәдени даму комитетінің мүшесі Д. Б. Закиева, ҚР Бала құқықтары жөніндегі уәкіл А. Саин, ҚР Адам құқықтары жөніндегі Уәкіл Э. А. Әзімова, ҚР БҒМ вице-министрі Б. А. Асылова, ҚР ІІМ Әкімшілік полиция комитетінің төрағасы М. А. Баймұқашев, сондай-ақ Бас прокуратураның, Қазақстан заңгерлер одағының, ЮНИСЕФ, кәмелетке толмағандар істері жөніндегі мамандандырылған соттың, Алматы қаласы әкімдігінің өкілдері, еліміздің жетекші ғалымдары және басқа да Ресей ІІМ басқару академиясы және Түркия полиция академиясы, Ресей ІІМ Шығыс Сібір институтының белсенді өкілдері аса қызығушылық танытып, қатысты. Сонымен қатар, ғылыми іс-шараға Қазақстан Республикасы ІІМ барлық аумақтық полиция және қылмыстық-атқару жүйесі департаменттерінің басшылары болды.
Жиын барысында «Талап» қолданбалы зерттеу орталығының директоры Рахым Ошақбаев пен ІІМ Алматы академиясының бастығы Айдар Сайтбеков тақырып төңірегінде ойларымен бөлісті.
Конференцияда кәмелетке толмағандарға қатысты құқық бұзушылықтар үшін жауапкершілікті реттейтін заңнаманы жетілдіру, балаларды қорғаудағы ведомствоаралық тәсіл, кәмелетке толмағандарды экстремистік ұйымдарға тартуға қарсы іс-қимыл, балаларға қатысты зорлық-зомбылықты жою стратегиялары, өмірлік дағдарыстық жағдайға тап болған кәмелетке толмағандарға психологиялық көмек көрсету ерекшеліктері туралы және басқа да көптеген мәселелер қаралды.
Іс-шараның нәтижелері бойынша конференцияның барлық қатысушыларымен мақұлданған қарар дайындалды. Мұндай конференция қоғам үшін Балалардың құқықтары мен қоғамды біріктірудегі, жаһандық, аймақтық және ұлттық деңгейде қауіпсіздік пен тұрақтылықты қамтамасыз етудегі рөлі мен маңыздылығы жоғары болары сөзссіз.