Алматыда тегін медициналық көмек пакетіне қордан қанша қаржы бөлінгені айтылды

Алматы, BAQ.KZ тілшісі. «Әлеуметтік медициналық сақтандыру қоры» КЕАҚ Алматы қаласы филиалының директоры Тілеухан Әбілдаев өткен жылы тегін медициналық көмек пакетіне қордан қанша қаржы бөлінгенін мәлімдеді.

Оның айтуынша, өткен жылы Алматыда Медициналық сақтандыру қоры тегін көмек пакеті шеңберінде көрсетілген медкөмекке 82,2 млрд теңге жұмсаған. Оның ішінде, 9,8 млрд теңге жедел жәрдем және санитарлық авиация қызметіне, 36,8 млрд теңге – бастапқы медициналық-санитарлық көмекке, яғни, емхана деңгейінде көрсетілген қызметтерге, 16,5 млрд теңге – онкологиялық көмекке, 2,4 млрд теңге – консультативтік-диагностикалық көмекке, 5,8 млрд теңге – амбулаторлық гемодиализге жұмсалған.

Сонымен қатар ол жоғары технологиялы медициналық қызметтерді пайдалану көрсеткіші артқанын жеткізді.

Қор 2021 жылы жоғары технологиялардың көмегімен жасалатын операциялар мен манипуляцияларға 14,9 млрд теңге төледі. Мысалы, 2020 жылы Алматы қаласы бойынша жалпы құны 563 млн теңге болатын  643 ЭКО процедурасы жасалған болса, 2021 жылы аталған қызмет саны 5,7 есе артқан. Өткен жылы 3687 экстракорпоральды ұрықтандыру жасалып, оған 3,5 млрд теңге жұмсалды.  Тағы бір мысал, 2020 жылы жоғары технологиялардың көмегімен 184 кардиохирургиялық операция жасалған болса, 2021 жылы аталған қызмет көлемі 7 есе артып, 1329 ота жасалған. Оған Қор 5,7 млрд теңге төледі,-деді Әбілдаев.  

Сондай-ақ ол диспансерлік есепте тұрған азаматтар дәрі-дәрмекпен тегін қамтамасыз етілетінін айтты. 2021 жылы тегін медициналық көмек және міндетті әлеуметтік медициналық сақтандыру пакеттері шеңберінде дәрі-дәрмекпен қамтуға 24,8 млрд теңге бөлінген.

Тегін медициналық көмек пакеті бойынша 35 түрлі сырқат бойынша дәрі-дәрмек беріледі. Ал, МӘМС пакетінде ересектерге 41 нозология, балаларға 63 нозология бойынша дәрі беріледі. 2021 жылы тегін медициналық көмек және міндетті әлеуметтік медициналық сақтандыру пакеттері шеңберінде дәрі-дәрмекпен қамтуға 24,8 млрд теңге бөлінген болатын. Жыл соңына дейін тегін медициналық көмек пакетінде – 219 мыңнан астам пациент, МӘМС пакетінде – 26 мыңнан астам ересек пен 40 мыңнан астам бала дәрімен қамтамасыз етілді. Ал, 2022 жылға 20 млрд теңгенің дәрі-дәрмегін сатып алу туралы жоспар бекітілді. Дәрілік заттар жыл басынан бері бекітілген кесте бойынша жеткізіліп жатыр,-деді ол.

Оның айтуынша, науқастар тегін дәрі-дәрмекке қатысты мәліметті СК-Фармацияның 1439 байланыс орталығынан ала алады.