Алматыда қанша адам коменданттық сағатты бұзғаны белгілі болды

Алматы, BAQ.KZ тілшісі. Коменданттық сағатты бұзғаны үшін 84 адам әкімшілік жауапқа тартылды. Бұл туралы Алматы қаласы Полиция департаментінің бастығы Қанат Таймерденов Алматының тыныс-тіршілігін қалпына келтіру жөніндегі қалалық штаб отырысында айтты.

Аталған отырыс қала әкімі Б. Сағынтаевтың төрағалығымен өтіп жатыр. Оның айтуынша, қаладағы қоғамдық тәртіпті қамтамасыз етуге және аса маңызды нысандарды қорғауға 3 800 полиция мен жауынгер жұмылдырылған.

Қалада үш аусымды режимде полиция және әскери қызметкерлерден құрылған жаяу патрулдер жұмыс атқаруда. Қала шекарасының негізгі бағыттары бойынша 5 блок-бекет жұмыс істеп тұр. Оған 390 адам жұмылдырылған. Қорғаныс министрлігі әскери қызметкерлері қаланың барлық маңызды стратегиялық нысандарын қорғап тұр. Полиция банктердің 49 есеп айырысу бөлімшесін күзетке алды,-деді ол.

Таймерденов сондай-ақ терроризмге қарсы операция басталғалы ІІМ-нің органдарына 2 300 адам жеткізілгенін айтты.

Оның 232-і қарақшы мен жаппай тәртіпсіздікке қатысқандар, олар қамауға алынды. Коменданттық сағатты бұзғаны үшін 84 адам әкімшілік жауапқа тартылды. Қалада тоналған 7 қару-жарақ дүкенінен 1 347 бірлік қару ұрланған. Осыған қатысты арнайы тергеу тобы құрылды. Осы сәтке дейін 127 қару тәркіленді, оның 58-і аңшылық дүкеннен ұрланғаны анықталды,-деді Қ. Таймерденов.