Алматыда коронавирусқа қарсы күреске 22,9 млрд теңге жұмсалды

Нұр-Сұлтан, BAQ.KZ. Коронавирус пен пневмонияға шалдыққан азаматтар медициналық көмекті сақтандырылған-сақтандырылмағанына қарамастан ала алады. Медициналық сақтандыру қоры тарапынан қауіпті инфекцияға қарсы күреске 159 млрд теңгеден астам қаржы қарастырылған. 

Бұл туралы Қордың Алматы қалалық филиалы хабарлады.

Филиал мәліметінше, тегін медициналық көмек пен міндетті әлеуметтік медициналық сақтандыру пакеттеріне коронавирусты емдеуге қатысты өзгерістер енгізілген. Сонымен қатар қос пакет шеңберінде мобильді бригадалар мен COVID-19 шалдыққан пациенттерге үй жағдайында стационарлық қызмет көрсету мүмкіндіктері қарастырылған. Медициналық көмек азаматтардың сақтандыру жүйесіндегі статусына қарамастан көрсетіледі. Бұл өзгерістер, әсіресе, жұқпалы аурулар өршитін күз мезгілінде медкөмектің қолжетімділігін арттыруға септігін тигізері анық.

Қазіргі таңда Қор деңгейінде коронавирус пен пневмонияға қарсы күреске 159 млрд теңгеден астам қаржы қарастырылған. Алматы қаласы бойынша аталған шараларға жұмсалатын қаражаттың жалпы сомасы 22,9 млрд теңгені құрайды, - деді филиал басшысы Тілеухан Әбілдаев.

Наурыз бен тамыз аралығында медицина қызметкерлеріне 11,6 млрд теңге қосымша ақы төленген. ПТР анализдерге 471 млн теңге бөлінді.

Өткен алты айда 33,8 мыңнан астам медицина қызметкеріне коронавирусқа қатысты қосымша ақы төленген. Эпидемияға қарсы іс-шараларға жұмылдырылған емдеу мекемелерінің қызметкерлері барлығы 11,6 млрд теңге үстемақы алды. Соның ішінде:

- 1-топ – 5 млрд. 811,4 млн теңге (9 729 адам);

- 2-топ – 4 млрд. 413,9 млн теңге (14 535 адам);

- 3-топ – 1 млрд. 421,8 млн теңге (9 623 адам).

Естеріңізге сала кетсек, пандемия басталғалы бері Қазақстан бойынша дәрігерлердің жалақысына қосымша 73 млрд теңгеден астам үстемақы төленген.