Алматыда ірі құрылыс нысаны бұзылады

Сот шешімі бойынша Достық даңғылы 170/1 мекен-жайындағы ғимарат бұзылады, деп хабарлайды Алматыдағы BAQ.KZ тілшісі.

Учаскедегі құрылысты меншік иесі 2005 жылы бастаған, содан кейін нысан бірнеше жыл бойы салынбаған.

Кейін учаске өзге меншік иесіне берілген. Меншік иесі қолында келісілген эскиздік жоба, құрылыс-монтаж жұмыстарын бастау туралы хабарлама, авторлық және техникалық қадағалау болмаса да құрылысты жалғастырған. Сондай ақ, аумақта заңсыз сауда нысандарын тұрғызған.

Алматының қала құрылысын бақылау басқармасы Медеу аудандық сотына ғимаратты бұзу туралы талап арыз берген, сот оны қанағаттандырды. 2023 жылғы 29 тамыздан кейін Алматы қалалық соты бірінші сатыдағы шешімді өзгеріссіз қалдырды.

Сонымен қатар, басқарма заңсыз сауда павильондарын бұзуға талап арыз түсірді. 2023 жылғы 2 мамырда сауда объектілерін бұзу туралы шешім шығарылды. Бүгінгі күні сот шешімі орындалды, павильондар бұзылды.

Естеріңізге сала кетейік, бұған дейін Алматы әкімі Ерболат Досаев заңсыз құрылысты бақылауды күшейтуді тапсырған болатын.

Қала бойынша талап қою қызметінің нәтижелері бойынша өткен жылдан бастап 36 заңсыз нысан толығымен немесе ішінара бұзылды, оның ішінде бизнес-орталықтар, мейрамханалар, толықтырулар мен автосервистер, «Мечта» және KHAN сияқты ірі тұрғын кешендері бар.