Алматыда 60 жыл болған құбырды алмастыру үшін көлік қозғалысы шектеледі

1 шілдеден 31 тамызға дейін Алматының Түрксіб ауданындағы Сүйінбай даңғылында №375 үйден №419 үйге дейін көлік қозғалысы шектеледі, дер хабарлайды BAQ.KZ мегаполис әкімдігіне сілтеме жасап.

Аталған көшеде қозғалыс шығыс жаққа қарай жабылады. Батыс жағында автокөлік үшін екіжақты қозғалыс ұйымдастырылады.

1967 жылдан бастап пайдалануға берілген жалпы ұзындығы 506 метрлік құбырды ауыстыру кезінде қауіпсіздікті қамтамасыз ету үшін уақытша шектеу енгізіледі.

Уақытша қолайсыздыққа түсіністікпен қарауды және көрсетілген аумақты айналып өту жолдарын алдын ала қарастыруды сұраймыз, - делінген әкімдіктің хабарламасында.

Ескеретін жайт, қозғалысты шектеуге қатысты барлық ақпарат almaty.kz сайтында, @AlmatyJoly Telegram арнасында, аудандық әкімдіктер мен басқармалардың әлеуметтік желілерінде, сондай-ақ "2GIS" және "Яндекс карталары" сервистерінде жарияланған.