Алматы тауларында жасөспірім жартастан құлап кетті

Алматы тауларында 15 метр биіктен құлаған жасөспірім құтқарылды, деп хабарлайды Алматыдағы BAQ.KZ тілшісі.

Құтқарушыларға хабарлама 17 шілде сағат 16:50-де түскен.

17 жастағы үш жасөспірім Алматы тауларында жолдан адасып қалған. Өтініш берушілердің айтуынша, олардың бірі жартастан құлап, есінен танып қалған. Жасөспірімдердің координаты берілді, - дейді ведомство.

Оқиға орнына сағат 17: 05-те құрамында 5 адам, 1 техника бар "БАУ" бақылау-құтқару пунктінің экипажы аттанады.
Жасөспірімдер Терешкова шыңында болған, сағат түнгі он шамасында құтқарушылар құлаған баланы тапқан.

Ол шамамен 15 метр биіктіктен құлаған. Оның иығы, шынтағы, жамбасы сынған, сондай-ақ омыртқасы зақымданған болуы мүмкін. Сол себепті жасөспірімді қолмен тасу мүмкін болмады. Жәбірленуші тікұшақпен эвакуацияланды, - дейді құтқарушылар.

Жасөспірім № 1 қалалық балалар ауруханасына жеткізілді. Қасындағы екі серіктесіне де көмек көрсетіледі.