Алматы-Шымкент тас жолындағы жол апаты. 4 адам реанимацияда жатыр

Б. Момышұлы ауылындағы орталық аудандық ауруханасына сағат 17:45-ке дейін 26 адам жеткізілді, деп хабарлайды BAQ.KZ.

Оның 4-і реанимацияда. Жағдайлары ауыр. Ауыр жағдайдағы бір науқасты санавиация арқылы облыс орталығына жеткізу ұйымдастырылды. Нұрлыкент ауылының Мәдениет үйінде жылыту пункті ұйымдастырылды, онда қазіргі уақытта 19 адам, оның ішінде 5 бала бар. Олар ыстық тамақпен, төсек-орынмен қамтамасыз етілген, - делінген хабарламада.

Оқиға орнында Жуалы ауданының әкімі Жалғас Мұртаза, полиция департаментінің бастығы Арманбек Баймурзин, ТЖД бастығының орынбасары Руслан Орынбеков барды.

Қазіргі уақытта «Батыс Еуропа – Батыс Қытай» трассасының 593-тен 534 км-ге дейінгі бөлігінде жол ашық.

Жолдарды тазарту жұмыстары жүргізіліп жатыр.

Еске салсақ, 31 қаңтарда сағат 10:47 – де Жуалы ауданының Нұрлыкент ауылының маңында «Батыс Еуропа-Батыс Қытай» Республикалық маңызы бар автожолының 567 шақырымында ауа райының қолайсыздығына байланысты (көктайғақ, көрінудің шектелуі, боран) 26 автокөліктің (4 жолаушылар автобусы, 4 жүк автомашинасы және жеңіл автомобильдер) қатысуымен жол-көлік оқиғасы болды.