Алматы қаласының Спорт басқармасына жаңа басшы тағайындалды

Алматы, BAQ.KZ. Алматы қаласы  Спорт  басқармасының басшысы болып Ерден Рашидұлы Хайруллин тағайындалды. Бұл туралы қала әкімдігі хабарлады.

Ерден Рашидұлы Хайруллин 2009 жылы Қ. Сәтбаев атындағы Қазақ Ұлттық техникалық университетін «Автоматтандыру және басқару» мамандығы бойынша бітірген, 2011 жылы Қ. Сәтбаев атындағы Қазақ Ұлттық техникалық университетін «Экономика» мамандығы  бойынша  тәмамдаған  және Азаматтық авиация академиясынын авиация техникасы және технологиясының магистрі дәрежесін алған.

2012-2019 жылдары Алмалы ауданы әкімі аппаратында кәсіпкерлікті және өнеркәсіпті дамыту бөлімінің бас маманы, осы бөлімнің басшысы болып қызмет атқарған.
2019-2022 жылдары Алматы қаласы Алмалы ауданы әкімінің орынбасары болып жұмыс істеген.

Бұған дейін бұл қызметті Рүстем Байсейітов атқарған болатын. Жақында ол қаңтар оқиғасы кезінде алған жарақатынан толық айықпағанын, әлі толыққанды оңалту курстарынан өту үшін уақыт қажеттігін айтып, жұмыстан кететінін мәлімдеген.

Айта кесек, қаңтар оқиғасында сол кездегі қала әкімі Бақытжан Сағынтаевқа жасалған қастандық барысында әкімнің жанында отырған  Рустем Байсейітовке оқ тиіп, жараланған болатын.