Алматы қаласында дәрі-дәрмек бағасы бір жылда 18% қымбаттады

Биыл шілдеде фармацевтикалық өнімдер бір айда 0,2%, бір жылда 10,8% қымбаттады. Ал жылдық динамикада ең қатты қымбаттаған өңір Алматыда болды. Бұл жақта дәрі-дәрмек бағасы 1 жылда 18% қымбаттады, деп хабарлайды BAQ.KZ energyprom.kz сайтына сілтеме жасап.

Ай сайынғы динамика бойынша Павлодар облысында баға 1,2% өсті. Ұлытауда баға 0,7%, Шығыс Қазақстан, Жамбыл, Жетісу және Қостанай облыстарында 0,6% өсті. Атырау және Ақмола облыстарында баға бұрынғы деңгейде қалды. Түркістан, Қарағанды және Алматы облыстарында баға 0,4%, 0,3% және 0,1% төмендеді.

Жылдық динамикада ең қатты қымбаттаған өңір Алматыда болды. Бұл жақта дәрі-дәрмек бағасы 1 жылда 18% қымбаттаса, Ұлытау облысында 15,4% және Қызылорда облысында 14,9% қымбаттады. Ең аз қымбаттаған өңір – Жетісу облысы: 5,9% ғана.

Биыл бірінші жарты жылдық қорытындысы бойынша, Қазақстанға 694,2 млн АҚШ доллары сомасында 13,9 мың тонна дәрі-дәрмек импортталды. ТМД елдерінен Қазақстанға 4 мың тонна дәрі-дәрмек әкелінді. Бұл – былтырғыдан 3,8% аз. Барлық дәрі-дәрмектің басым бөлігі Ресейден әкелінді. Ол мемлекеттен 40,9 млн АҚШ долларына 2,9 мың тонна дәрі-дәрмек әкелінді.