Алматы облысында кремний өндірісі іске қосылды

Алматы, BAQ.KZ. Қаратал ауданында жоғары сапалы кремний өндірісі іске қосылды. Зауыттың ашылу салтанатына Алматы облысының әкімі Қанат Бозымбаев қатысты. Бұл туралы «Жетісу Медиа» ақпараттық алаңы хабарлады.

«KazSilicon» металлургиялық комбинатын қайта жаңғырту үшін 4 миллиард теңге жұмсалған. Нысанда құрылыс-монтаждау жұмыстары жүргізіліп, қажет жабдықтар мен пештер жөнделген.  

Президент Қасым-Жомарт Тоқаев өзінің Қазақстан халқына жыл сайынғы Жолдауында еліміздің ілгерілеуі өңірлердің өркендеуіне тікелей байланысты екенін атап өтті. Бұл мәселеде ол 2019 жылғы Жолдауында егжей-тегжейлі тоқталды. "Қуатты өңірлер – қуатты ел" қағидасы өзгеріссіз қалады. "KazSilicon" сияқты өңдеуші өнеркәсіп кәсіпорындарын қалпына келтіру өңірлердің дамуына зор мән береді. Кәсіпорынның экспорттық бағыты әлеуметтік-экономикалық тұрақтылықты қамтамасыз етеді, - деді Алматы облысының әкімі Қанат Бозымбаев.

Айта кету керек, аталмыш зауыт 200-ден астам адамды жұмыс орнымен қамтамасыз етпек.