Алматы облысында Асы жайлауына барар жолда көлік аударылды

Әлеуметтік желіде Алматы облысындағы Түрген шатқалында болған жол апатының видеосы тарады. Кадрларда жол жиегінен шығып кетіп, аударылып қалған көлік бейнеленген. Алдын ала мәлімет бойынша, апат Түрген – Асы автожолында болған.

Полицияның хабарлауынша, жол-көлік оқиғасы 14 мамыр күні шамамен сағат 13:30-да тіркелген.

Алдын ала мәліметке сәйкес, Hyundai көлігінің 66 жастағы жүргізушісі Түрген – Асы автожолында кері жүріп келе жатып, көлікті басқара алмай қалған. Соның салдарынан автокөлік жол жиегіне шығып кетіп, аударылған.

Жол апаты салдарынан көлік жолаушысы зардап шекті. Ол түрлі жарақатпен медициналық мекемеге жеткізілген.

Қазіргі уақытта полиция қызметкерлері оқиғаның барлық мән-жайын анықтап, процессуалдық тексеру жүргізіп жатыр. Тексеру қорытындысы бойынша тиісті процессуалдық шешім қабылданады.

Сондай-ақ жүргізушінің Қазақстан заңнамасына сәйкес жауапкершілікке тартылғаны белгілі болды.