Алматы облысында алғаш рет «Garden Day - Aport» бақша күні өтті

ҚР Президенті жанындағы Ұлттық ғылым академиясы алғаш рет «Garden Day - Aport» атты бақша күнін өткізді, деп хабарлайды BAQ.KZ. 

Іс-шара Қазақ жеміс-көкөніс шаруашылығы ғылыми-зерттеу институтының «Талғар» аймақтық филиалының базасында ұйымдастырылды.

Оған ҚР Ауыл шаруашылығы вице-министрі Ербол Тасжүреков, Алматы облысы әкімінің орынбасары Нұржан Құдайбергенов, ғылыми-зерттеу институттарының жетекшілері, агробизнес өкілдері, Түркия, Польша және Болгариядан келген ғалымдар қатысты.
Президент тапсырмасы бойынша Қазақстанда ұлттық бренд - апортты қайта жаңғырту шаралары қабылданып жатыр.
Қазақстан Республикасы Ұлттық ғылым академиясының президенті Ахылбек Күрішбаев «Талғар» филиалында 5 гектар жерге Алматы апорты мен Қан қызыл апорты сорттарының аналық көшеттері отырғызылғанын хабарлады. Көшеттер апорттың 115 клонынан дәмдік қасиеттері мен ауруға төзімділігіне қарай іріктелген. Сонымен қатар, генетикалық талдау арқылы апортпен үйлесімді Сиверс жабайы алмасы сорттары іріктеліп, тұқымдық бақ салынды. Ескерте кетейік, 2023 жылы Қазақстанда 251,5 мың тонна алма өсірілді, оның 98,5 мың тоннасы импортталған. Өнеркәсіптік бақтарда 194,1 мың тонна алма өсірілді. Тек осы жылдың алғашқы жартысында 94 мың тонна алма импортталған.
Ауыл шаруашылығы вице-министрі Ербол Тасжүреков жеміс-жидек шаруашылығын дамытудың елдің азық-түлік қауіпсіздігі мен экономикасы үшін маңызы зор екенін атап өтіп, бағбандарды қолдау шаралары туралы айтты.
Іс-шараға қатысушылар жеміс-жидек шаруашылығы саласын дамыту жоспарлары мен перспективалары, атап айтқанда, апортты қайта жаңғырту және сақтау туралы хабардар болды, сондай-ақ өнімнің экологиялық қауіпсіздігін және топырақ құнарлылығын қалпына келтіруді ескере отырып, жеміс-жидек дақылдарын өсірудің перспективалы технологиялары бойынша ғылыми-практикалық ұсыныстар алды.