Алимент төлемеген 28 борышкерге қатысты қылмыстық іс қозғалды

Ақмола облысында алимент төлемеген 28 борышкерге қатысты қылмыстық іс тіркелді, деп хабарлайды BAQ.KZ.

Ақмола облысы прокуратурасы Қазақстан Республикасы Қылмыстық кодексінің 139-бабы бойынша алимент төлемейтіндерді қылмыстық жауапкершілікке тарту бойынша жұмысты жандандырды.

Прокуратураның үйлестіру шараларымен алимент төлеу жөніндегі міндеттерді атқармайтын 28 борышкерге қатысты қылмыстық істер тіркелді, оның ішінде 8 борышкер бойынша айыптау үкімдері шығарылды. Бүгінгі таңда сотқа дейінгі тергеп-тексеру органдарының өндірісінде тағы 5 қылмыстық іс бар, - деді Ақмола облысының прокуратурасы.

Сонымен қатар, Қазақстан Республикасы Әкімшілік құқық бұзушылық туралы Кодексінің 669-бабы бойынша алимент өндіріп алу туралы сот шешімін орындамағаны үшін 100-ден астам борышкерлер әкімшілік жауаптылыққа тартылды.

Сондай-ақ, Ақмола облысы прокуратурасының шараларымен 600 млн тенгеден астам алимент бойынша қарыз өтелді.