Әлеуметтік Кодекс жобасын түсіндіру үшін өңірлерге мобильді топтар жіберіледі

Еңбек және халықты әлеуметтік қорғау министрлігі арнайы мобильдік топтарды құрды, олар ағымдағы жылдың 19 қыркүйегі мен 15 қарашасы аралығында Мемлекет Басшысының Қазақстан халқына Жолдауының әлеуметтік-еңбек саласындағы негізгі бағыттарын және  Әлеуметтік кодексі жобасының нормаларын түсіндіру үшін Қазақстанның өңірлеріне шығатын болады, деп хабарлайды BAQ.KZ.

Мобильдік топтардың құрамына еңбек және халықты әлеуметтік қорғау вице-министрлері, Еңбекмині еншілес ұйымдарының, Еңбекмині Еңбек және әлеуметтік қорғау комитетінің аумақтық департаменттерінің, мемлекеттік әлеуметтік сақтандыру қоры филиалдарының, Мемлекеттік аннуитеттік компанияның, Еңбекті қорғау жөніндегі республикалық ғылыми-зерттеу институтының басшылары және басқалар кірді.

Екі ай бойы мобильді топтар республиканың барлық 20 өңірін аралайды:

Абай облысы (Үржар, Аягөз, Бородулиха, Ақсуат аудандары және Курчатов қаласы);

Ақмола облысы (Бұланды, Астрахан, Шортанды, Ерейментау аудандары және Біржан сал ауданы);

Ақтөбе облысы (Алға, Мұғалжар, Қобда, Ойыл, Шалқар аудандары және Хромтау қаласы);

Алматы облысы (Кеген, Райымбек, Еңбекшіқазақ, Балқаш аудандары);

Атырау облысы (Қызылқоға, Құрманғазы, Жылыой, Исатай аудандары);

Шығыс Қазақстан облысы (Алтай, Зайсан, Катонқарағай, Тарбағатай, Самар аудандары және Риддер қаласы);

Жамбыл облысы (Сарысу, Мойынқұм, Талас, Меркі және Шу аудандары);

Жетісу облысы (Алакөл, Сарқан, Кербұлақ, Панфилов аудандары);

Батыс Қазақстан облысы (Сырым, Қаратөбе, Жәнібек, Бөкей ордасы аудандары және Орал қаласы);

Қарағанды облысы (Бұқар Жырау, Нұра, Қарқаралы аудандары, Шахтинск және Приозерск қалалары);

Қостанай облысы (Арқалық қаласы, Амангелді, Жангелді, Ұзынкөл аудандары);

Қызылорда облысы (Арал, Қазалы, Қармақшы аудандары және Байқоңыр қаласы);

Маңғыстау облысы (Бейнеу, Мұнайлы, Қарақия аудандары, Жаңаөзен және Ақтау қалалары);

Павлодар облысы (Май, Баянауыл, Ертіс, Железин аудандары);

Солтүстік Қазақстан облысы (Тимирязев, Уәлиханов, Аққайың аудандары және Шал ақын ауданы);

Түркістан облысы (Бәйдібек, Шардара, Келес, Қазығұрт, Созақ аудандары және Кентау қаласы);

Ұлытау облысы (Жаңаарқа, Қаражал, Ұлытау аудандары және Жезқазған қаласы);

Республикалық маңызы бар қалалар-Алматы,  Нұрсұлтан (Астана?) және Шымкент.

Өңірлерді аралау барысында мобильдік топтардың мүшелері медициналық-әлеуметтік мекемелердегі Халықпен, жұмыс берушілермен және еңбек ұжымдарымен, жастармен, ұжымдармен және қамқорлықтағылармен кездесулер өткізеді.

Қазақстандықтарға отбасының цифрлық картасын енгізу, жұмыспен қамту саласындағы жаңа саясат, жаңа көші-қон саясаты, балалы отбасыларды қолдау шаралары, арнаулы әлеуметтік қызметтер жүйесін жаңғырту, зейнетақы төлемдерін арттыру туралы айтылады.