Әлемдегі орнымыз ұлтымыздың сапасына байланысты - Президент

Түркістанда өтіп жатқан құрылтайда Мемлекет басшысы қуатты ел боламыз десек бірлесе жұмыс істеу керек екенін айтты, деп хабарлайды BAQ.KZ.

Президенттің айтуынша, әлемдегі орнымыз, ең алдымен, ұлтымыздың сапасына байланысты болмақ.

Қуатты ел боламыз десек, бірлесе отырып, бірқатар маңызды сауалға жауап беруге тиіспіз. Біз болашағы қандай мемлекет құрып жатырмыз? Ұлтымыз нені армандайды? Қазақстан азаматы қандай болуы керек? Еліміздің басты тірегі не? Миссиясы қандай? Мен бүгін осыған қатысты ой-пікірімді ортаға салғым келеді. Біз қолға алған саяси-экономикалық реформаларды қоғамдағы терең әлеуметтік-мәдени өзгерістермен қатар іске асыруымыз керек. Бұл – маңызды міндет. Біз алға үздіксіз қадам басуымыз керек,-деді Президент.

Сондай-ақ, елдің дамуына кедергі келтіретін дүниенің барлығынан арылу керек екенін жеткізді.

Елді дамытуға кедергі келтіретін нәрсенің бәрінен арылып, құндылықтарымызды нығайта түсуіміз қажет. Сонда ғана ұлттың жаңа сапасын қалыптастырамыз, сан ғасырлық мемлекеттілігіміздің тұғырын бекемдейміз. Олай болмаса, даму көшінің соңында қалып, ақырында құрдымға кетеміз. Жалпы, қандай да бір құндылықты Жарлықпен немесе заңмен орнықтыру мүмкін емес. Мен мұны өте жақсы түсінемін,-деді Мемлекет басшысы.