Ақтөбеде пәтер тонаған ұры ұсталды

Нұр-Сұлтан, BAQ.KZ. 22 желтоқсан күні күндіз Ақтөбе қаласындағы Ақжар-2 тұрғын үйінде пәтер ұрлығы жасалған. Белгісіз адам үйдің пластикалық терезесін сындырып, кіріп зергерлік бұйымдар мен ақша ұрлап кеткен.

Жедел-іздестіру шаралары барысында полиция қызметкерлері “ізін суытпай” Шернияз көшесіндегі Алматы облысының 34 жастағы тұрғынының басқаруымен “Toyota Camry-50” автокөлігін тоқтатты. Автокөлікті тінту кезінде полиция көлік салонының “қобдишасынан” зергерлік бұйымдар мен ірі сомадағы ақшаны тәркіледі.

Ұрлық фактісі бойынша ҚР Қылмыстық Кодексінің 188-бабы 3-бөлігі (Ұрлық) бойынша сотқа дейінгі тергеу жүргізілуде. Күдікті Ақтөбе қаласының тергеу изоляторына қамалды.

Алдын ала тергеу барысында анықталғандай, күдікті күзет жүйесімен жабдықталмаған үйлерді таңдаған. Сонымен қатар ұсталған күдіктінің Ақтөбедегі бес пәтер ұрлығына қатысы бары анықталды.

Сондай-ақ, ұсталған азаматтың облыс орталығында жасалған басқа да ұқсас қылмыстарға қатыстылығы тексерілуде.

Ақтөбе облысының Полиция департаменті азаматтардан бейнекамералар мен дабыл беру жүйелерін орнату арқылы сақтық шараларын қабылдауды сұрайды. Әрқашан пәтерден қысқа уақытқа шығып кететін болсаңыз да, есіктерді құлыптаңыз.