Ақтау қаласының әкімі бірнеше нысанға кезекті рейд жүргізді
Нұр-Сұлтан, BAQ.KZ. Ақтау қаласының әкімі Нұрдәулет Қилыбай бастаған әкімдік қызметкерлері мен жергілікті полиция өкілімен бірлескен топ қаладағы бірнеше нысанға кезекті рейд жүргізді.
Маңғыстау облыстық Бас санитарлық дәрігерінің 2020 жылдың 21 қазаны күнгі Қаулысына сәйкес, дәмханалар мен мейрамханаларға сағат 22.00-ге дейін ғана қызмет етуге рұқсат берілген болатын.
Алайда 12-шағынауданда орналасқан «Sovereign Pub» және «Кристалл», «Шығыс-2» шағынауданындағы «Бай-ер» дәмханалары ережені ескермей, 22.00-ден кейін жұмыс істеп тұрғаны анықталды. Қоғамдық ас ішетін орындардың иелерінен түсініктеме алынып, акт толтырылды.
Аталған нысан иелеріне Әкімшілік құқық бұзушылық туралы кодекстің 425-бабына сәйкес, 30 бен 200 АЕК аралығында айыппұл салынбақ. Айта кетейік, елімізде індеттің алдын алу мақсатында қабылданған Бас санитарлық дәрігердің Қаулысының орындалуын бақылау мақсатындағы мониторингілік топ жұмысы күнделікті жалғаспақ.