Академик Төрегелді Шарманов сыйлығына өтінім беру басталды
Нұр-Сұлтан, BAQ.KZ. Академик Төрегелді Шарманов сыйлығының І тоқсандағы қорытындысы шықты, енді ІІ тоқсанға өтінім беру басталды.
Академик Төрегелді Шарманов сыйлығына арналған байқаудың І тоқсанның қорытындысы бойынша жеңімпаз анықталды. Бұл сыйлық медицина және денсаулық саласы бойынша қазақ тілінде жарық көрген өзекті материалдарға әр тоқсан сайын тағайындалатынын айтып өткен жөн.
Конкурсқа қатысушылардың ішінен мұғалім-дефектолог Әсел Маралбектің dalanews.kz порталына шыққан «Аутизмді ерте анықтау – жақсы нәтижеге қол жеткізеді» мақаласы конкурстық коммиссия мүшелерінің шешімі бойынша үздік атанды.
Жеңімпазға «Төрегелді Шармановтың халықаралық қоры» ҚҚ атынан арнайы ақшалай сыйақы мен диплом табысталады.
Академик Төрегелді Шарманов сыйлығын алу конкурсына қатысу үшін өтінім беру жалғасуда. ІІ тоқсандағы өтінім беру мерзімі 30 маусымға дейін жалғасады.
Конкурсқа денсаулық сақтау және түрлі аурулардың алдын алу, сондай-ақ денсаулық пен медицинаға қатысты қызықты және маңызды ақпараттарды қамтитын қазақ тіліндегі жобалар немесе бұрын жарияланған материалдар қабылданады. Конкурсқа ғылыми-көпшілік мақала, шағын бейнеролик, комикс немесе инфографика форматындағы материалдар қатыса алады.
Бұл сыйлықты тағайындау критерийлері ретінде материалдың өзектілігі мен пайдалылығы, жарияланымның ғылыми негізділігі және анықтығы, түпнұсқа буын және презентация стилі, медициналық білімі жоқ оқырмандардың түсінуіне оңай болуы, тақырыбын қамту деңгейі (сайттағы оқылым саны, әлеуметтік желілердегі белсенділік, оқырмандармен қарым-қатынас), барлық авторлық құқықты сақтау (плагиаттың болмауы) сияқты талаптар қойылады.
Жазбаша материалдағы көлем талабы – 1000-нан 4000-ға дейін баспа белгісі, ал YouTube-тегі видеолар ұзақтығы 5 минутқа дейін.
Бұл сыйлықты берудегі мақсат – медицина және денсаулыққа қатысты өзекті мәліметтерді баршаға, әсіресе қазақтілді оқырманға кеңірек жеткізуге бағытталған тақырыптағы материалдарды қолдау. Аталмыш сыйлық, іріктеудің негізгі талаптары, сыйлықақы мөлшері және өтінім беру мерзімдері туралы толық ақпаратты осы сілтемеден оқи аласыздар.