Адам саудасының құрбаны болмау үшін қалай сақтану керек?
Бұл туралы ҚР ІІМ Ұйымдасқан қылмысқа қарсы күрес департаменті басқармасы бастығының орынбасары Шынар Кучербаева айтты, деп хабарлайды BAQ.KZ тілшісі.
Ол жұмыс күшін жалдаушылар адамдарды қанауға, саудаға тартуда өз әдістерін жетілдіріп жатқанын жеткізді. Сондықтан одан сақтану жолына тоқталды.
Адам шетелге шығып бара жатқанда құжаттарының көшірмелерін ата-анасына, туғандарына қалдыруы, кіммен, қайда бара жатқанын айтып, контактілерін қалдырып, әрдайым байланысқа шығып тұруы маңызды, – деді ол халықаралық Адам құқықтары күніне арналған іс-шарада.
Сондай-ақ Шынар Кучербаева шетелге шыққанда құжаттарды, әсіресе төлқұжатты ешкімге бермеуге шақырды. Ал шетелге жұмыс істеуге баратындар еңбек шартымен дұрыстап танысу керегін айтты.
Адам шетелге жұмысқа шығып бара жатса, қарыз құлдығына түсіп қалмас үшін еңбек шартымен дұрыстап танысуы қажет. Жұмыспен қамтумен айналысатын өзге елдегі жеке ұйымдар күмән тудырса, Еңбек министрлігіне шығып, ондай ұйым бар ма, оған сенуге бола ма екенін тексеруге болады, – деді ол.
Шынар Кучербаева Қазақстанға жұмыс іздеп келген шетелдіктер мен мигранттар да еңбекті қанауға түсіп жататынын жеткізді.
Жыл басынан Қазақстанда адам саудасына қатысты 222 қылмыс тіркелді. Оның ішінде жыныстық қанау, еңбекті қанау, мәжбүрлеп қайыр сұрату, нәрестелер саудасы бар. Бірақ ең жиі кездесетіні – жеңгетайлық және жезөкшелікпен айналысатын притондар, – деді ол.
Айта кетейік, халықаралық Адам құқықтары күніне арналған іс-шара Сәкен Сейфуллин атындағы Қазақ агротехникалық зерттеу университетінде ҚР Президентінің жанындағы Адам құқықтары жөніндегі комиссияның ұйымдастыруымен өтті.
