Абай облысында 7 медициналық пункт өз жұмысын бастады

«Ауылдық денсаулық сақтауды жаңғырту» Ұлттық пилоттық жобасы аясында Абай облысында алғашқы медициналық-санитарлық көмек нысандарының құрылыс жұмыстары жүргізілуде. Жоба аясында Жарма ауданының Салқынтөбе, Бородулиха ауданының Успенка, Көкпекті ауданының Үлгілі-Малшы, Биғаш, Шәріптоғай және Бесқарағай ауданының Белокаменка, Стеклянка ауылдарында медициналық пунктер салтанатты түрде ашылды, деп хабарлайды BAQ.KZ.

Барлық медициналық пунктер бір мезетте 25 адамға дейін қызмет көрсете алады. Барлығында емшара қабылдау мен физиотерапия кабинеттері және дәріхана бар.Жаңа медициналық пункттер заманауи стандарттарға сай келеді. Қажетті кабинеттер мен алғашқы медициналық көмек көрсету қарастырылған. Пункттер су, жылу желілері, электрмен жабдықталып, пандустар орнатылған.

Енді ауылымызда өзіміздің медициналық пунктіміз бар. Бұрын дәрігерге қаралу үшін аудан орталығына баратынбыз. Енді жолға шығудың қажеті жоқ. Бұл мемлекеттің қамқорлығы деп білеміз, - дейді Биғаш ауылының тұрғыны Қадыр Әлімбаев.