+30: алдағы күндерге ауа райы болжамы қандай

"Қазгидромет" 18, 19 және 20 наурызға арналған ауа райы болжамын жариялады, деп хабарлайды BAQ.KZ.

Болжамға сәйкес, республиканың басым бөлігі антициклон жотасының ықпалында болады, осыған байланысты күн ашық, жауын-шашынсыз болады. 

Тек батыс, солтүстік-батыс және солтүстік өңірлер циклонның жырасының әсерінде болып, жаңбыр мен қар түрінде жауын-шашын күтіледі, жел күшейіп, жолдарда көктайғақ болуы мүмкін. Қазақстан бойынша тұман түсуі ықтимал.

Елдің солтүстігінде түнде ауа температурасы -3...+5 градусқа дейін жылыса, күндіз +5...+16 градусқа дейін көтеріледі. Орталықта түнде -3...+5 градус, күндіз +5...+20 градус, шығыста түнде -7...+5 градус, күндіз +3...+16 градус болады. Батыста түнде -5...+5 градусқа дейін төмендеп, күндіз +5...+18 градусқа дейін жылынады. Ал оңтүстікте және оңтүстік-шығыста түнде +5...+13, күндіз +22...+30 градусқа дейін көтеріледі, – делінген хабарламада.

Еске салсақ, бұған дейін "Қазгидромет" 2025 жылдың наурыз айына арналған ауа райы болжамын ұсынған болатын. Синоптиктер көктемнің алғашқы айы жылы және жауын-шашынды болады деп болжады. 

Қазақстан аумағында орташа ауа температурасы қалыпты мәннен 2 градусқа жоғары болмақ. Наурыз айында жауын-шашын республиканың басым бөлігінде нормадан көп, ал оңтүстік-батыс пен оңтүстікте шамамен нормаға сай түседі.