2023 жылы экспортқа қандай отандық өнім шығарылды

Бұл туралы Мәжілістегі Үкімет сағатында Ауыл шаруашылығы министрі Айдарбек Сапаров айтты, деп хабарлайды BAQ.KZ тілшісі.

Министрдің дерегінше, 2023 жылдың қорытындысы бойынша тамақ өнімдерін өндіру көлемі өткен жылдың қорытындысынан 1,5%-ға өсіп, 3,1 трлн теңге болған.

Салаға келіп жатқан инвестициялар қатары өсіп жатыр. Былтыр тамақ өнімдері өндірісінің негізгі капиталына салынған инвестиция көлемі 3,9%-ға өсіп, 151 млрд теңгеге жетті. АӨК өнімдерінің экспорт көлемі 2022 жылдың деңгейінде сақталып, 2023 жылы 5,4 млрд долларды құрады, - деді Сапаров.

Сонымен қатар былтыр қолайсыз климаттық жағдайларға қарамастан, сала өндіріс көлемінің артуы есебінен құлдырауға жол бермеді. Қайта өңделген өнімдердің экспорттағы үлесі 42,6%-ға жетіп, ақшалай мәнде 2,3 млрд долларды құрады.

Экспортқа шығарылған өңделген мал шаруашылығы өнімдерінің көлемі 187 млн долларға жетті. Бұл барлық өңделген өнім экспортының 8,2%-ын құрайды. Дегенмен, бұл үлесті арттырудың әлеуеті зор. Бұл ретте заттай түрде өңделген сүт өндірісі 2,9%-ға, сары май 18,6%-ға, ірімшік пен сүзбе 10,5%-ға, салқындатылған ет 9,8%-ға, шұжық өнімдері 0,9%-ға өсті. Алайда құрғақ сүт өндірісі 25,4%-ға, ет консервілері өндірісі 3,9%-ға төмендеді, - деп түсіндірді Ауыл шаруашылығы министрі Үкімет сағатында.