2023 жылы бюджетке 19 трлн теңге түскен

Қаржы министрі Мәди Тәкиев Парламент палаталарының бірлескен отырысында 2023 жылғы республикалық бюджеттің қалай атқарылғаны жайлы есеп берді, деп хабарлайды BAQ.KZ тілшісі.

Оның сөзінше, 2023 жылы жалпы ішкі өнім 5,1%-ға өскен.

Жылдық инфляция деңгейі 2 есеге төмендеп, 9,8% көлемінде тұрақталды. Жалпы бюджет тапшылығы 3,1 трлн теңге немесе жалпы ішкі өнім 2,6%. Мемлекеттік борыш 27,2 трлн теңге немесе жалпы ішкі өнімге 22,8%-ға жетті, - деп айтты министр отырыста.

Қаржы министрінің мәліметінше, республикалық бюджеттің кірістері бойынша жылдық жоспар 99,9%-ға орындалып, бюджетке 19 трлн теңге түскен.

Бюджеттің шығыстары 99,6% атқарылып, 22,4 трлн теңгеге жетті. Игерілмеген қаражат 73 млрд теңге болса, Үкімет резервін қоса алғанда 27 млрд теңге үнемделді, - деп түсіндірді Тәкиев.

Сонымен қатар былтыр Ұлттық қордың активтері 13,4%-ға ұлғайып, 60 млрд долларға жеткен.