2000-нан астам оқушы тоғызқұмалақ ойыны бойынша гиннес рекордын орнатады

Оқу ағарту министрлігінің мәлімдеуінше, биылғы жылдың 9 қыркүйегінде Тоғызқұмалақ күніне орай Алматы қаласында тоғызқұмалақтан сайыс өтеді, деп хабарлайды BAQ.KZ.

Оған 2000-нан астам жоғары сынып оқушылары қатысады. Олардың мақсаты — Қазақстанның Гиннес рекордтар кітабына ену.

Тоғызқұмалақ – қазақтың ұлттық дәстүрлі ойындарының бірі. Сондай-ақ 2020 жылы тоғызқұмалақ ЮНЕСКО шешімімен адамзаттың мәдени мұралары тізіміне енгізілген.

Айта кетейік, аталмыш шара Қазақстан Республикасының Тұңғыш Президенті атындағы саябақта сағат 10:00-де өтеді.

Сонымен қатар 2023 жылдың 21-24 қыркүйегі аралығында Алматы қаласындағы ADD үстел теннисі орталығында рапид және блиц бойынша оқушылар арасында (U-15, U-17) тоғызқұмалақтан әлем чемпионаты ұйымдастырылады.

Турнирге әлемнің 20 елінен 150-ден астам ойыншы қатысады.