20-дан астам азамат кәмелетке толмаған алаяқтың құрығына түскен

20-дан астам азамат кәмелетке толмағанның алаяқтық схемасынан зардап шекті, деп хабарлайды BAQ.KZ.

Бас прокуратураның мәліметінше, алаяқ банк қосымшасы арқылы елорда тұрғындарына ақшалай кредиттерді ресімдеу жоспарын әзірлеген.

Жәбірленушілердің ақшаларын трейдингтік компанияларға инвестициялайтынын айтып, несиені өзі жабуға уәде берген. Сонымен қатар, жәбірленушілерді қарыз сомасының 22%, сондай-ақ келген әр жаңа клиент үшін 10% түріндегі сыйақы үлесін алатындарымен алдаған, - деп хабарлады Бас прокуратурадан.

Осылайша, кәмелетке толмаған азамат 20 жәбірленушінің 11 млн теңгеден астам ақшалай қаражатын жымқырған.

Сотта мемлекеттік айыптаушы сотталушының кінәсін дәлелдеп, оның жәбірленушілер үшін табыс табу ниеті болмағанын анықтады. Барлық ақшалай қаражатты өз қажеттіліктеріне жұмсағаны сотта дәлелденді. Сот үкімімен жәбірленушілерге келтірілген залал толықтай өндіріліп, кінәлі тұлға сотталды. Жәбірленушілердің азаматтық талаптары қанағаттандырылды, - делінген хабарламада. 

Үкім заңды күшіне енді. 

Қала прокурорлары тұрғындарға тез және үлкен табыс әкелетін күмәнді мәмілелерден бас тартуды ескертеді, өйткені бұл алаяқтық белгісі болуы ықтимал.