150 оқушы «Сылдырмалы доп» жарысына қатысады

Ұлттық ғылыми-практикалық дене шынықтыру орталығының хабарлауынша, 25-31 наурыз аралығында ерекше қажеттіліктері бар балалар арасында голболдан «Сылдырмалы доп» республикалық жарыс өтеді, деп хабарлайды BAQ.KZ.

Бұған дейін голболдан мектепішілік іріктеу турлары өткен болатын. Нәтижесінде республикалық жарысқа тоғыз өңірден 150 оқушы іріктелді. 

Айта кетейік, финалдық ойын әр жас санаты бойынша жеке өтеді. Барлық ойындар IBSA халықаралық голбол ережелеріне сәйкес өткізіледі. 

Республикалық жарыс спортты насихаттау және дамыту, мектеп жасындағы балаларды голбол сабақтарына тарту, сондай-ақ, голболдан ұлттық құраманың резервін қалытастыру үшін талантты ойыншыларды анықтауды көздейді,– дейді Спорттық іс-шаралар, статистика және аналитика бөлімінің басшысы Мира Мухамадиева.

Спорттық жарыс жеті күн бойы өтеді, «Үздік қорғаушы», «Үздік шабуылшы» номинациялары бойынша мықтылар анықталады. Жүлделі орындарға ие болған команда мен жаттықтырушылар кубок, диплом және медальдармен марапатталады.