1 айлық сәби мен 73 жастағы қария коронавирустан емделіп шықты

Алматы, BAQ.KZ. Алматы облысы Еңбекшіқазақ ауданының дәрігерлері 1 айлық сәбиді мен 73 жастағы қария коронавирустан емдеп шығарды. 

Алматы облысы әкімдігінің мәліметінше, бүгін облыста коронавирус инфекциясын жұқтырған 14 адам ауруханадан шығарылған. 

Емделіп шыққан 14 адамның 9-ы бір отбасының мүшелері. Отбасында вирус жұқтырғандардың қатарында 2017, 2014, 2012 жылы туған балалармен қатар 2020 жылдың 26 наурыз күні  дүниеге келген  1 айлық сәби де бар, - делінген хабарламада.

Еңбекшіқазақ ауданаралық көпсалалы аурухананың директоры Жамила Абеуова коронавирус диагнозымен түскен ең кішкентай пациентті дәрігерлер ерекше бақылауға алғанын айтты.

Бала ауруханаға түскен кезде туғанына 18 күн ғана болған. Сондықтан ерекше бақылауға алып, күнделікті емдеу тәсілін дәрігерлермен талқылап отырдық. Балада ем қабылдау кезінде ешқандай қиындық туған жоқ. Бала анасының жанында болды. Ауруханадағы 20 күн ішінде 1 келі салмақ қосты. Қазір жағдайы жақсы, - дейді бас дәрігер. 

Сонымен қатар Еңбекшіқазақ ауданында 16 сәуір күні тіркелген 2 адамның бірі 73 жастағы қария болса, бірі 1992 жылы туған Есік қаласының тұрғыны. Дәрігерлер қария коронавирус инфекциясынан толық емделіп шыққанын айтады.

Ал Қаскелең қалалық инфекциялық ауруханасында 17 сәуірден бастап ем қабылдаған Қарасай ауданының 1971, 1967, 1985 жылы туған тұрғындары  бүгін толықтай жазылып шықты.  

Аталған екі ауданның емделушілеріне 1 мамыр күні жүргізілген қайта талдау қорытындылары теріс нәтиже көрсетті.

Атап өтсек, Еңбекшіқазақ ауданында жазылып шыққандардың барлығы Рахат ауылдық округіне қарасты "Көксай", "Береке", "Алтын Алма", "Алтын Адам" саяжайларының тұрғындары. Аталған саяжайларда аурудың жаңа жағдайы тіркелмегендіктен, олардағы карантин алынып тасталды. 

COVID-19 инфекциясының таралуы бойынша эпидемологиялық жағдайдың өзгеруіне байланысты карантин шараларының режимі мен мерзімі өзгеруі мүмкін. Бірақ жалпы карантин талаптары сақталады. 

Жалпы, бүгінгі күні Алматы облысында коронавирус диагнозымен 149 адам тіркелді. Оның 28-сы емделіп шықты.