Қоғалы ауылын су басты деген ақпарат жалған – әкімдік

Нұр-Сұлтан, BAQ.KZ. Жетісай ауданынының Қоғалы ауылы тұрғындары төтенше жағдай қызметкерлеріне көмектесуде, деп хабарлады Түркістан облысы әкімінің баспасөз қызметі.

Түркістан облысы Жетісай ауданы Атамекен ауыл округі Қоғалы ауылын тасқын су басты деген ақпарат шындыққа жанаспайды. Алайда ондағы 186 үйде тұратын 1400 тұрғынның басым көпшілігі яғни әйелдер қауымы бала-шағаларын алып, бүгінде өз еріктерімен Жетісай қаласындағы туған-туыстарының үйлеріне орналасқан, - делінген әкімдік таратқан ақпаратта.

Десек те, аудан әкімдігі қауіпсіз аймаққа көшемін деушілерге арнап үш мектепті әзірлеп, ауылға 50 орындық автобус та қойып қойған. Бірақ ауылдың ер кісілері көшуден өз еріктерімен бас тартып, елдімекен іргесіндегі дамбы көтеру жұмыстарына атсалсысуды жөн көрді.

Жетісай ауданының Өзбекстан Республикасымен шекаралас орналасқан Қоғалы ауылындағы жағдайдың бұған дейін бақылауда болғанын ескертеміз. Аталған елдімекенде аудан әкімдігі мен төтенше жағдайлар қызметінің мамандары су тасқынын алдын алу шараларын жүргізіп, дамбы тұрғызу, құм толы қапшық қалау жұмыстарын атқаруда, - деді Түркістан облысы әкімінің баспасөз қызметі.