Зүлфия Чиншанло Азия чемпионатында үздік төрттікке енді

Нұр-Сұлтан, BAQ.KZ. Ауыр атлетикадан Қытайдың Нинбо қаласында өтіп жатқан Азия чемпионатында қазақстандық Зүлфия Чиншанло төртінші орынға табан тіреді. Бұл туралы ҰОК баспасөз қызметі хабарлады. 

Зүлфия Чиншанло жұлқа көтеруде 84 келіні, серпе көтеруде 110 келіні бағындырған болатын. Қоссайыс қорытындысы бойынша, Зүлфия 194 келіні еңсерген. 

Бұл оның Азия чемпионатында төртінші орынға тұрақтауына мүмкіндік береді. 

"Нинбодағы құрлық біріншілігінде бүгін 81 келідегі Денис Уланов пен Нұрлыбек Сәменовке жанкүйер боламыз", - делінген ҰОК хабарламасында.