Алматы, BAQ.KZ. 9 желтоқсанында Алматыда "Құрбан болған тұлғалар" атты көрме өтеді.
ҚР Мемлекеттік орталық музейінде қазақ халқының Үш бәйтерегі, сталиндік зобалаңның құрбандары, артына өшпес рухани мұра қалдырған қазақтың ақиық ақыны, қоғам қайраткері – Ілияс Жансүгіров, жалынды ақын, жазушы, дарынды драматург Сәкен Сейфуллин мен ауызша әңгіменің хас шебері, сатрик-жазушы Бейімбет Майлиннің 125 жылдық мерейтойына орай "Құрбан болған тұлғалар" атты көрме өтеді.
Тарихи деректерге сүйенсек, 1930-1953 жылдар аралығында 40 миллионнан астам Кеңес азаматтары репрессияға ұшыраған. Осы кезеңде қазақтардың 40 пайызы қаза тапқан. Әсіресе бұл заңсыз жазалауға Кеңес Одағы құрамында болған барлық халықтар мен ұлттардың бетке ұстар зиялы қауым өкілдері ұшыраған. Бар өмірін қазақ халқының руханиятына арнаған тұлғалардың 125 жылдығына арналған іс-шаралар ел көлемінде кешенді қолға алынуда.
Орталық музейде ұйымдастырылып отырған көрменің негізгі мақсаты – 30-40 жылдары құрбан болған зиялы қауымның азаматтық тұлғасымен таныстыру, өзге де дара тұстарын өскелең ұрпаққа насихаттау. Көрмеге Орталық музей қорындағы І.Жансүгіровтың, С.Сейфуллин, Б.Майлиннің жеке кешендеріндері, сонымен қатар замандастары – Т.Рысқұлов, С.Қожановтың мұрағаттан алынған материалдары қойылады, - делінген хабарламада.Сондай-ақ, келушілер назарына сол жылдардағы зиялы қауымның жұмыс кабинетінің көрінісі мен С.Сейфуллиннің жеке мөрі, алтын сағаты, портсигары, сакваяжы және тағы басқа заттары ұсынылады.
2020 жылдың 9 қаңтарына дейін жалғасатын көрмені ҚР Президентінің архиві, ҚР Орталық мемлекеттік мұрағаты және "Ғылым Ордасы" Орталық ғылыми кітапханасымен бірлесіп ұйымдастырады.
