Алматыдағы Қазақ көз аурулары ғылыми-зерттеу институтында Қазақстан-Германия глаукома орталығы ашылды, деп хабарлайды BAQ.KZ 24kz-ке сілтеме жасап.
Екі ел дәрігерлері соқырлыққа әкелетін глаукома дертін ерте анықтап, емдеуге үлес қоспақшы. Офтальмология саласындағы халықаралық ынтымақтастықты дамытуға бағытталған шараға қала әкімдігінің өкілдері, институт басшылығы мен серіктестер қатысты. Қазақ көз аурулары ғылыми-зерттеу институтының жаңа ғимаратынан ашылған орталық тәжірибе алмасу, оқыту және глаукоманы емдеудің озық технологияларын енгізетін кәсіби алаң болмақ. Неміс тарапы отандық дәрігерлермен бірлесіп, суқараңғы дертін емдеуді жоғары деңгейге көтереміз деп отыр.
Бұл ынтымақтастық ғылыми ізденістерді, медициналық тәжірибені қамтиды. Екіжақты қарым-қатынас өзара тәжірибе алмасу ретінде жүзеге асатын болады. Біздің қызметіміз глаукомамен ауыратын науқастарға медициналық көмек көрсетуді жақсартуға ықпал етеді деп сенеміз, - дейді профессор Карл Эрб (Германия).
Қазақстанда глаукома диагнозымен 70 мыңнан астам науқас тіркелген. Және бұл сан жыл сайын өсуде.
Науқастардың көру қабілетін сақтап қалу үшін ерте диагностикалау мен уақтылы емдеу маңызды, - дейді дәрігерлер. 2011 жылдан бері глаукома скрининг бағдарламасына енгізілген. Соның арқасында дертті ерте анықтау екі есе артты.
Ауылдан келген біздің ағаларымыз, апаларымыз бізге келгенде міндетті түрде бір көзі тас көрмей қалады. Келесі көзі 10%, 50% қалса, соны сақтап қалу үшін ғана қызмет істеп жүрміз, ол дұрыс емес. Уақытында келетін болса, біз шамамыз келгенінше пайдамыз тиетіндей жағдай болады. Соны жеткізу үшін осындай орталықтар ашылып жатыр, - дейді ҚР ДСМ бас офтальмологы Тұрсынгүл Ботабекова.
Шара аясында Қазақ көз аурулары ғылыми-зерттеу институты мен Берлин қолданбалы офтальмология институты ынтымақтастық туралы меморандумға қол қойды. Стратегиялық серіктестік көз ауруларын емдеуде жаңа көкжиектерге жол ашпақ.
