Алматы, BAQ.KZ. Тоқтаусыз жауған жаңбырдан қалада 16 су басу жағдайы тіркелген. Бұл туралы қала әкімдігі хабарлады.
Мегаполисте жауын-шашын жауу кезінде су басудың алдын алу және оны жою мақсатында 2020 жылдың 14-15 сәуірі аралығында мердігерлік ұйымдар мен аудандық әкімдік қызметкерлерінің күшімен тәуліктік кезекшілік ұйымдастырылған.Өткен түнде су басу бойынша 16 жағдай тіркелді. Соның ішінде 13 аула аумағы мен 3 көшені су басты. Сондай-ақ, Жетісу ауданына тиесілі Райымбек даңғылы мен Желтоқсан көшелернің қиылысында апатты жағдайда тұрған ағаш құлап, жолды басып қалды. Қалалық құтқару қызметінің қызметкерлері апаттың салдарын жойды, - делінген хабарламада.
Түнгі уақыттағы жұмыстарға 164 адам, 99 бірлік арнайы техника және 31 мотопомпа жұмылдырылған.
Таңертеңнен бастап суды бөгетсіз өткізу және ағызуды қамтамасыз ету жұмыстарын ұйымдастыру үшін 779 адам, 276 бірлік арнайы техника және 32 бірлік мотопомпа іске қосылды. Барлығы 880 дана құм салынған қап қолданылды, - делінген хабарламада.
